Kalibutan sa boksing gitay-og ni Ruiz

CEBU, Philippines — Sama sa usa ka makusog nga linog gitay-og ni Andy Ruiz Jr. ang kalibutan sa boksing kagahapong adlawa.

Sa usa ka makakalisang nga kadaogan, ang Meksikanong si Ruiz (33-1, 22KOs) nga gibansagan nga 'Fat Boy' mipalukapa sa kanhi wa pay pildeng si Anthony Joshua (22-1, 21KOs) upat ka higayon aron sakmiton ang IBF, IBO, WBA ug WBO heavyweight titles taliwala sa nakugang nga mga nanan-aw didto dsa Madison Square Garden sa New York.

Dili tiaw ang nakab-ot nga kalamposan ni Ruiz kay mismo siya mibangon una human matumba sa ikatulong hugna sa wala pa gipatikangkang ang inilog kaayong Briton niyang kaatbang nga mi-away sa Amerika sa labing unang higayon.

Si Joshua natumba tagurha ka higayon sa ikatulo ug ikapitong hugna. Mibarog siya human natikangkang sa ikaduhang higayons sa ikapitong hugna apan wala nay moutpiece ug mi-agas na ang dugo sa iyang ilong sa wala pa mibarag padung sa iyang corner.

Sa dihang gisukna siya ni reperi Michael Griffin kon mopadayon pa ba siya og away, misang-on si Joshua apan sa way paglangan-langan gi-udang ni Griffin ang away sa oras nga 1:27 sa ikapitong hugna.

Atol sa paghunong sa away, si Ruiz maoy naglabaw sa iskor sa duha sa tulo ka mga judges.

“Man, I just wanna thank God for giving me this victory,” matud pa ni Ruiz nga nahimong labing unang heavyweight champion gikan sa Mexico. “Without him, this wouldn’t have been possible. And I just feel so good, man. This is what I’ve been dreaming about. This is what I’ve been working hard for and I can’t believe I just made my dreams come true.”

Obligado hinoon si Ruiz nga makig-rematch ni Joshua ug gani gikatakda na kini karong Nobiembre o Disiembre didto sa United Kingdom, ang teritoryo ni Joshua.

Apan bisa'g unsa pa, ang kaparotan ni Joshua nakadiskaril sa gihandum untang unification bout nilang champion Deontay Wilder (41-0-1, 40KOs).

Taliwala sa mapait nga apakyasan nga iyang natilawan sa labing unang higayon sa iyang karera, si Joshua nangayo og pasaylo sa iyang mga fans.

“It just wasn’t my night. It was Andy Ruiz’s night. And now I’ve gotta go and do it again,” dason pa Joshua. (BANAT NEWS)