Suns lumamig sa Warriors

PHOENIX -- Humugot si Stephen Curry ng 10 sa kanyang 20 points sa fourth quarter at nakawala ang Golden State Warriors sa final canto para talunin ang Suns, 117-107.

Umiskor si Klay Thompson ng 25 points para sa Golden State, binigo ang Phoenix sa pang-18 sunod nilang pagkikita.

Nagdagdag si Kevin Durant ng 21 points kasunod ang 18 markers ni DeMarcus Cousins para sa Warriors.

Binanderahan naman ni Kelly Oubre Jr. ang Suns, naglaro nang wala si lea­ding scorer Devin Booker na may right hamstring injury, mula sa kanyang 25 points habang may 23 markers si Deandre Ayton.

Nasibak si Golden State forward Draymond Green sa fourth quarter matapos matawagan ng kanyang ikalawang technical foul.

Matapos kunin ng Phoenix ang 94-88 abante ay naghulog ang Golden State ng 13-0 run, tampok ang three-point shot ni Curry para iwanan ang Suns sa 101-94 sa hu­ling 5:46 minuto ng fourth period.

Sa Dallas, kumo­lekta si Giannis Antetokounmpo ng 29 points at 17 rebounds at dumiretso ang Milwaukee Bucks sa kanilang  ikaanim na sunod na panalo mula sa 122-107 paggupo sa Mavericks.

Tumipa si Anteto­kounmpo ng 13-of-19 fieldgoal shooting para sa Milwaukee at sinapawan si kapwa Euro star Luka Doncic, ang Dallas rookie sensation na umiskor ng 20 points.

Nagdagdag si big man Brook Lopez ng 20 points para sa Bucks, binitbit ang NBA best record na 41-13.

Sa New York, nagposte si Lauri Markkanen ng 31 points at 18 rebounds para banderahan ang Chicago Bulls sa 125-106 paglampaso sa Brooklyn Nets.

Nag-ambag si Zach LaVine ng 23 points habang may 18 markers si Otto Porter Jr. sa una niyang laro para sa Bulls.