Falcons itinakas ni Manganti
MANILA, Philippines — Umiskor si Sean Manganti ng winning goal sa huling segundo upang iangat ang Adamson Soaring Falcons sa 69-68 panalo laban sa University of the Philippines Fighting Maroons kahapon at manatili sa top spot sa pagpapatuloy ng Season 81 UAAP basketball tournament sa FilOil Flying V Arena sa San Juan City.
Naibaba ng Falcons ang 12-point deficit sa apat na puntos lamang, 61-64 bago kumonekta si Jerrick Ahanmisi ng triples para sa 64-65 agwat mahigit 2:22 pa ang natitira.
Sa undergoal follow-up ni Bright Akhuetie sa mintis ni Paul Desiderio muling nabawi ng Fighting Maroons ang bentahe, 68-67 ngunit umiskor si Manganti ng short jumper para selyuhan ang panalo ng Adamson.
Ang UP na nahulog sa 1-3 win-loss slate ay pinangunahan ni Akhuetie sa kanyang 22 puntos at 20 rebounds.
Humataw si Manganti ng 18 puntos kabilang na ang winning shot at dalawang assists habang si Ahanmisi ay tumipa ng 16 puntos, 14 nito sa second half para sa Falcons ni coach Franz Pumaren.
Sa iba pang laro, hindi na nag-aksaya pa ng oras ang nagdedepesang Ateneo kaya maaga pa lamang lumalayo na sila tungo sa 89-62 panalo kontra sa Universirty of the East para umakyat sa solo second spot sa 3-1 record sa likuran ng Adamson Falcons (4-0).
- Latest
