Racela ilisan sa TNT?
CEBU, Philippines — Migimaw ang hugon-hugon nga posibleng hulipan sa TNT KaTropa ang ilang head coach nga si Nash Racela kinsa gipugos pag-leave sa mga kadagkuan sa koponan.
Si Racela wala paubana usa sa team practice ug ang assistant coach nga si Eric Gonzales ang midala sa TNT kagahapon atol sa ilang duwa batok Columbian Dyip.
Usa ka wa magpailang team insider ang mibutyag sa Sports5, nga wala na ganahi ang mga kadagkuan sa TNT sa sunod-sunod nga pilde sa koponan lakip na ang bati nilang sugod sa Governors Cup.
Si Racela maoy gihimong head coach sa TNT niadtong tuig 2016 hulip ni Jong Uichico, apan labing layu nga naabtan sa koponan ubos sa iyang giya mao ang finals sa 2017 Commissioner's Cup diin napilde sila sa San Miguel Beermen.
Karon nga season, ang TNT igo lang nakasud sa quarterfinals sa All-Filipino Cup ug Commissioner's Cup sa wala pa sayung nataktak sa playoffs. Sa pagsugod sa Governors Cup, ang TNT nasugamak sa tulo ka sunod-sunod nga pilde. (BANAT NEWS)
- Latest
