E&F Surplus nagsolo na karon sa liderato
CEBU, Philippines — Nagsolo na karon sa liderato ang E&F Surplus human makaipsot sa RJ Store, 85-82 sa 13th J&J Surplus Ballclub 30-Above basketball tournament niadtong Sabado didto sa GT Academy gym sa Tayud, Lilo-an.
Hinay-hinay na mibalik ang maayong pulso ni team owner Fury Trazona ug miiskor siya og 22 puntos aron mangu sa E&F Surplus nga mao na lang ang koponan nga wala pa'y pilde sud sa upat ka duwa.
Gawas nga midaog, ang E&F Surplus mao sab ang nakabugto sa nagkadinang daog sa RJ Store ni Jun Rayan Pepito nga nagbitbit na karon og 3-1 record.
Pirmeng naggukod ang E&F Surplus ug gibiyaan sila og nuybe puntos human sa tulo ka kuwarter, 47-56. Apan ang E&F Surplus wala mapagngi sa paglaum ug padayong nakigkumbati hangtod nga naangkon ang tungason nga kadaogan.
Si Tingan Gestopa miarangkada og 20 puntos alang sa E&F Surplus.
Ang RJ Store nga gipaluyohan sa Chichay's Chicharon, gipangulohan ni Jay-R Yerro nga mikolekta og 20 puntos, gisundan ni Raniel Montejo nga miamot og 17 puntos, samtang sila si Joel Sayta ug Johnrey Caparroso nag-amotay og 12 puntos.
Sa lain pang aksiyon, ang J&J Surplus wa'y puangod nga milubong sa Union Galvasteel, 111-60 nga maoy labing dako nga lubong sa kasamtangang liga.
Lima sa unom ka players nga nakapuntos alang sa J&J Surplus ni ballclub president Henry Agbon, miiskor og double figures.
Gipangulohan kini ni Jomar Tiwan nga miratsada og 23 puntos.
Nakapanemaho na sa ilang sayong kadaogan ang J&J Surplus human sila miposte og 84-45 human sa tulo ka kuwarter.
Bugtong si Jaybee Gellocane lang ang miiskor og double digits sa Union Galvasteel ni Arnold Labustro nga miposa og 19 puntos.
Gilubong sab og taga-liog sa Victorious Eagle ang Pilapilan sa iskor nga 100-64.
Ang team manager nga si Danrex Bayonla mao mismo ang nangulo sa daog nga midagit og 19 puntos ug ingon man si Aljun Noble.
Dili na malalis ang dagan sa resulta sa duwa human milabaw og 27 puntos ang Victorious sa halftime, 42-15.
Sila si Royax ug CJ nagkumboya'g 33 puntos sa napildeng Pilapilan.
Puntos Matag Usa
Unang duwa:
E&F Surplus (85) – Trazona 22, Gestopa 20, Laude 15, Betinol 6, Ursal 6, Igoy 6, Caballes 3, A. Sabang 2, Ponce 2, K. Sabang 2, Judaya 2.
RJ Store (82) – Yerro 20, Montejo 17, Sayta 12, Caparroso 12, Arocha 8, Mendoza 8, Nogas 5.
Ikaduhang duwa:
J&J Surplus (111) – Tiwan 23, Oroyan 22, Auman 22, Dela Rama 20, Herra 17, Astillero 7.
UNION Galvasteel (60) – Gellocane 19, Gaite 8, Tiongzon 7, Boyles 5, Flores 5, Mantos 3, Yballe 2, Arlabs 2, Orongan 2, Mantos 1.
Ikatulong duwa:
PILAPILAN (100) – Royax 19, CJ 14, Orque 11, Caparroso 9, Caparroso 5, Nulla 2, Dave 2.
VICTORIOUS (64) – Noble 19, Bayonla 19, C. Lascuña 15, Patalot 13, Zapanta 12, P. Lascuña 8, Jalang 5, JL James 4, Boysik 3, Calipes 2. (BANAT NEWS)
- Latest
