Ginebra, RoS unahang dumikit sa Finals

MANILA, Philippines — Dati niyang head coach si Tim Cone sa B-Meg at San Mig Coffee, kaya inaasahan ni James Yap na may nilulutong bagong estratehiya ang two-time PBA Grand Slam champion mentor.

“Knowing coach Tim, pag-aaralan nila ang mali nila,” wika ng 36-anyos na si Yap kay Cone. “Siyempre, kami ready lang.”

Umiskor si Yap, ang two-time MVP,  ng 18 points at pinamunuan ang 12-0 atake ng Rain or Shine sa fourth quarter para talunin ang Barangay Ginebra ni Cone, 109-100 sa Game Two ng kanilang semifinals showdown noong Huwebes sa 2018 PBA Commissioner’s Cup.

Tabla sa 1-1 sa kanilang best-of-five semifinals wars, mag-uunahan ang Elasto Painters at Gin Kings sa paglapit sa tiket sa PBA Finals sa bakbakan nila ngayong alas-7 ng gabi sa Game Three sa MOA Arena sa Pasay City.

Nauna nang pinatumba ng Ginebra ang Rain or Shine sa Game One, 102-89.

Bukod kay Yap, aasahan din ng Elasto Painters sina import Reggie Johnson, humakot ng 25 points at 20 rebounds sa Game Two, Raymond Almazan, Gabe Norwood, Maverick Ahanmisi at Beau Belga.

Muli namang sasandigan ng Gin Kings sina reinforcement Justin Brownlee, naglista ng 29 markers at 12 boards sa kanilang pagkatalo sa Game Two, Greg Slaughter, LA Tenorio, Scottie Thompson at Joe Devance.