Ex-PBA star Cardona nanunggab, gisikop
CEBU, Philippines — Nagtingkagol sa prisohan karon ang kanhi PBA scorer nga si Mark Cardona human kini midunggab sa iyang kapuyo didto sa Makati City.
Si Cardona mao ra usab ang midala sa iyang kapuyo nga si Bianca Jackes sa Makati Medical Center human niya kini giduslak sa kamot og kutsilyo. Ang kapolisan miingon nga si Cardona midunggab ni Jackes human ang duha naglalis sa ilang condominium unit sa maong lugar.
Si Cardona nag-atubang karon og kaso nga physical injury. Dili kini ang unang higayun nga gikiha si Cardona kinsa gipasakaan na niadtong miaging tuig human mamaligya og kinawat nga sakyanan.
Si Cardona nakontrobersyal na niadtong miaging tuig human kini misuway paghikog, apan nabuhi human natabang sa iyang pamilya.
Human sa maong insidente si Cardona nahatagan pa og tsansa nga mubalik og duwa uban sa GlobalPort Batang Pier apan wala gihapon kini magdugay. Miduwa na usab siya uban sa TNT KaTropa, Meralco Bolts, kanhi Air21 Express ug NLEX Road Warriors. (BANAT NEWS)
- Latest
