Navymen ‘di papayag na mawala sa itaas

PILI, Camarrines Sur --Hangga’t maaari ay hindi bibitawan ng Navy-Standard Insurance ang No. 1 hanggang No. 4 spot sa overall individual classification ng 2017 LBC Ronda Pilipinas.

“Kung kaya naming i-maintain ‘yung top four, ime-maintain namin pero kung hindi kaya, ise-secure na lang namin ‘yung first place,” pahayag  coach Reinhard Gorantes sa mga Navymen.

Kasalukuyang sinosolo ni Navy rider Rudy Roque ang overall individual lead sa kanyang oras na 18:12:48 kasunod ang mga kakamping sina Stage One winner Ronald Lomotos (18:13:47), Daniel Ven Carino (18:14:43) at Stage Two at Three king Jan Paul Morales (18:15:51).

Ang iba pang nasa Top 10 ay sina Stage Four king Cris Joven (18:16:08) ng Kinetix Lab-Army, Elmer Navarro (18:17:57) ng Go for Gold, Leonel Dimaano (18:18:01) ng RC Cola-NCR, Ismael Grospe (18:19:02) ng Go for Gold, Lord Anthony Del Rosario (18:19:44) ng Kinetix Lab-Army at Jonel Carcueva (18:20:33) ng Go for Gold.

Nakatakdang bitawan ngayon ang 227-km Stage Seven na magsisimula rito at magtatapos sa Daet, Camarines Norte.

Patuloy na isusuot ng 25-anyos na si Roque ang Red Jersey na hindi pa niya hinuhubad simula sa Stage One sa Vigan, Ilocos Sur.

“Hanggang kaya kong hawakan ‘yung overall lead, gagawin ko,” sabi ng anak ni dating Tour campaigner Manolito Roque, sa 14-stage race na inihahandog ng presentor na LBC katuwang ang MVP Sports Foundation, Petron, Mitsubishi, Versa.ph, Victory Liner, Maynilad, Standard Insurance.

“Puwede nating sabihing crucial ‘yung Stage Seven at Stage Eight, pero kami susunod lang sa game plan namin sa team,” sabi naman ng 31-anyos na si Morales. hangad maging unang back-to-back champion ng LBC Ronda Pilipinas.

Samantala, inaasahang maghahakot pa ng oras ang mga Navymen sa team overall classification matapos magtala ng oras na 73:56:63 para iwanan ang Go for Gold (74:20:67) at Kinetix Lab-Army (74:32:92).