SEABA tourney iniatras sa Mayo

MANILA, Philippines - Inihayag kamakalawa ni SBP president Al Panlilio na ipinagpaliban nila ang pagdaraos ng SEABA Championships para bigyan ng pagkakataon ang mga national team players na tapusin ang kanilang obligasyon sa Asean Basketball League (ABL) at sa Indonesian Basketball League (IBL) mula sa kahilingan ni SEABA president Erick Thohir ng Indonesia.

Naunang itinakda ang SEABA Championships sa Abril 23-30 bago ito inilipat sa Mayo 15-21.

Idaraos ang SEABA Championships sa Manila o sa Cebu matapos ibigay sa SBP ng FIBA Asia ang hosting rights.

Ang mananalo sa torneo ang kakatawan sa Southeast Asian sub-zone sa 16-team FIBA Asia Cup sa Beirut sa Agosto 10-20.

Ang top 14 finishers ng FIBA Asia Cup ang makakasama ng dalawang wildcards sa bagong FIBA World Cup qualifying system tampok ang anim na home-and-away windows simula sa Nobyembre.

Ayon kay Panlilio, ang pagpapaliban sa SEABA Championships ay iminungkahi nang dumalo sina SBP chairman emeritus Manny V. Pangilinan at Thohir sa FIBA Central Board meeting sa House of Basketball sa Mies, Switzerland.

Magtatapos ang ABL regular season sa Marso 26, habang ang IBL season ay magwawakas sa Mayo.

Ang Pilipinas, Malaysia, Vietnam at Singapore ay kakatawanin ng club teams sa ABL.

Sa ngayon, walong bansa ang nakakuha na ng tiket para sa FIBA Asia Cup.

Ito ang Lebanon bilang host country, Qatar bilang Gulf champion, Australia at New Zealand bilang wildcards at ang mga West Asia qualifiers na Iran, Jordan, Iraq at Syria.

Pito pang silya ang bakante sa FIBA Asia Cup -- tig-isa para sa Central Asia (posibleng Kazakhstan), Southeast Asia (posibleng Pilipinas), South Asia (posibleng India) at apat para sa East Asia (posibleng China, South Korea, Chinese-Taipei at Japan).

Sinabi ni Panlilio, sa ilalim ng Memorandum of Agreement na nilagdaan ng SBP at PBA, papayagan ang mga Gilas rookies na sumama sa national team practice dalawang buwan bago ang torneo pati na ang mga PBA players.

  “The final 12-man lineup is supposed to be confirmed 15 days before the tournament,” wika ni Panlilio.  “We’re asking the PBA to release the non-Gilas rookies in the pool a month before that deadline so that would make it 1 1/2 months before the tournament begins.  This would make it possible to assemble our complete pool for at least 1 1/2 months of training.”