Elite lider na Belo bumida sa panalo vs Bolts
MANILA, Philippines – Muling nagtala ng double digit si rookie Mac Belo para pangunahan ang Blackwater sa kanilang ikalawang sunod na panalo at masolo ang liderato ng 2016-2017 PBA Philippine Cup.
Kumolekta si Belo ng 25 points, 6 rebounds at 3 assists para akayin ang Elite sa 86-84 paglusot laban sa Meralco Bolts kagabi sa Smart Araneta Coliseum.
“We we’re very blessed na na-execute namin ‘yung mga play namin sa second half. Medyo gumanda ‘yung pasahan ng team sa second half kaya nakuha namin ‘yung panalo,” sabi ng 6-foot-4 na tubong Midsayap, North Cotabato.
Sa 94-87 panalo laban sa Phoenix sa kanilang unang laro noong nakaraang Miyerkules ay tumapos si Belo, kinuha ng Blackwater mula sa Gilas Pilipinas pool, na may 17 points, 9 rebounds at 2 assists.
Kumamada si Belo ng 10 points, tampok dito ang dalawang three-point shots, para itabla ang Elite sa 84-84 sa huling 1:40 minuto ng fourth quarter.
Nabigo namang makaiskor ang Bolts sa kanilang dalawang posesyon mula kina rookie Jonathan Grey at Cliff Hodge.
Ang supalpal ni Belo kay Reynel Hugnatan ang nagresulta sa basket ni Denok Miranda para sa 86-84 abante ng Blackwater sa natitirang 4.2 segundo kasunod ang tumalbog na jumper ni Joseph Yeo sa panig ng Meralco.
Nagtala si Hodge ng 14 points, 9 rebounds at 8 assists para sa Bolts, tinalo ng Ginebra Gin Kings sa nakaraang PBA Governor’s Cup Finals.
Samantala, kasalukuyang naglalaban ang Barangay Ginebra at TNT Katropa habang sinusulat ito.
Blackwater 86 - Belo 25, Pascual 13, Miranda 11, Dela Cruz 8, Sena 6, Pinto 5, Aguilar 5, Cervantes 5, Forrester 3, Ababou 3, Gamalinda 2, Banal 0, Buenafe 0.
Meralco 84 - Hodge 14, Grey 11, Newsome 11, Al-Hussaini 9, Amer 8, Daquioag 6, Hugnatan 6, Yeo 5, Chua 4, Faundo 4, Nabong 4, Dillinger 2.
Quarterscores: 22-27; 39-41; 68-67; 86-84.
- Latest