Melindo milampos pagsakmit sa interim IBF title
CEBU, Philippines - Usa ka dominanteng kadaugan ang gihimo ni Milan ‘El Metodico’ Melindo (35-2, 12KOs) nga midaog pinaagi sa “unanimous decision” batok ni Fahlan Sakkreerin (31-5, 16KOs) sa Thailand aron masakmit ang interim IBF light flyweight title sa main event sa “Pinoy Pride 39: Road to Redemption” sa miaging gabii didto sa Cebu Coliseum.
Agresibo nga miataki ang ALA Gym warrior sa sayong bahin sa away diin milabyog kini og mga kusog nga kinumo ni Sakkreerin nga nagkapuliki og panagang
Sa sangka tali sa duha ka tactical boxers, si Melindo miataki bisan taas pa niya ang nanulong nga boksidor nga nagsalig sa iyang jabs aron maduot palayo ang ALA boxer. Gamit iyang abilidad sa counter-punching, si Melindo mipatay-og ni Sakkreerin sa seventh round, apan ang Thai mipakita sa iyang kalig-on.
Miaksiyon og bawos si Sakkreerin sa mga hinapos nga rounds, samtang si Melindo daw mitigom og kusog. Pag-abot sa final round, gipagawas sa duha ang tanan nilang kusog, apan si Melindo maoy nakapabor human siya nakapaigo sa mas makabungog nga kinumo.
Human sa 10 rounds, tulo ka mga hurado ang mihatag og 117-111, 115-113 ug 115-113 tanan pabor ni Melindo.
“Kusog akong mga gipaigo niya (Sakkreerin) pero lig-on siya,” matud pa ni Melindo. “Nalipay ko kay nabuhat nako ang game plan ug pasalamat sab ko sa support sa fans nga maoy nakahatag og energy nako sa away.”
Sa maong kadaugan, si Melindo na ang mandatory challenger ni Japanese champion Akira Yaegashi.
“This one final task remaining for Milan and we are looking for the first quarter of the year. Whether here or in Japan, we will have Milan ready,” matud pa ni ALA Promotions President ug CEO Michael Aldeguer.
Sa supporting bouts, pulos midaog ang managsuong Prince’ Albert ug Jason 'El Nino' Pagara, apan sa managlahing paagi.
Si Albert (27-1, 18KOs) pakyas pagpakita og impresibong kadaugan batok ni Raymond Commey (16-4,9KOs) Ghana nga iyang gipilde pinaagi sa unanimous decision.
“Honestly, it was not an impressive performance from Albert, but we got to understand that it is not easy coming back from a devastating loss,” matud pa ni Aldeguer.
“We will give him more fights next year and hopefully, he can slowly regain his old form.”
Gibawi ra hinuon kini sa iyang maguwang ug WBO No. 1 junior welterweight nga si Jason (40-2, 25KOs) nga hapit wala paningta dihang gipatumba niini sa first round ang ex-Nicaraguan world champion nga si Jose Alfaro (28-11, 24KOs). (BANAT NEWS)
- Latest
