Iranian import lusot sa height limit
MANILA, Philippines – Nakapasa si Iranian point guard Mohammad Jamshidi sa height limit para sa mga Asian imports na maglalaro sa darating na 2016 PBA Governors’ Cup sa Hulyo 15.
Nasukatan si Jamshidi sa taas na 6-foot-2 3/4 para makapasok sa 6-foot-3 height limit para sa mga Asian imports.
Maglalaro si Jamshidi, ang point guard ng Iranian national team na humarap sa Gilas Pilipinas sa isang tune-up game bilang paghahanda sa FIBA Oympic Qualifying Tournament, para sa Meralco Bolts.
“We are pleased to announce that Mohammad Jamshidi, member of the Iranian National Team for the Meralco Bolts as an Asian import in the upcoming third conference,” pahayag ng Meralco sa isang statement.
“His all-around game, versatility, and experience in international competitions will be a welcome addition to the Bolts,” dagdag pa ng koponan.
Ang mga PBA teams ay pinapayagang kumuha ng Asian import na may height limit na 6’3.
Samantala, mula sa Barangay Ginebra at Globalport ay lumipat si import Dior Lowhorn sa Rain or Shine.
Naglaro si Lowhorn, produkto ng Texas Tech, para sa Gin Kings noong 2013 PBA Governor’s Cup bago kumampanya sa panig ng Batang Pier sa sumunod na taon.
Hangad ng Elasto Painters ang kanilang ikalawang sunod na PBA crown matapos pagharian ang nakaraang PBA Commissioner’s Cup.
Maliban kay Lowhorn, ang iba pang balik-imports ay sina Marqus Blakely (Star), Arizona Reid (San Miguel), Paul Harris (Ginebra), Bill Walker (NLEX), Eric Dawson (Blackwater), Dominic Sutton (Globalport) at Allen Durham (Meralco).
Ang mga bago namang paparada ay sina James White (Mahindra) at Jason Maxiell (Talk ‘N Text).
Kasalukuyan namang naghahanap ng kanilang reinforcements ang Alaska at Phoenix para sa season-ending conference.
- Latest
