Phinma/SWU cobras daog sa overtime

CEBU, Philippines - Ang Phinma/Southwestern University Cobras nangayo una og overtime sa wala pa moposte og 86-79 nga kadaugan batok sa Highlands Corned Beef/University  of Cebu Webmasters  pagtak-op sa semifinals sa 8th Cebu Schools Athletic Foundation, Inc. (CESAFI) Partner’s Cup kagabii didto sa Cebu Coliseum.

Ang Cobras nagbitbit og baraha nga 2-1 ug ang ilang tsansa nga makasud sa finals mag-agad sa resulta sa duwa tali sa Worthy/University of the Visayas Green Lancers ug Mighty Sports/University of San Jose-Recoletos Jaguars nga nagkumbati pa  sa pagsulat ning balita. 

Si Shaquille Imperial mitali og 23 puntos, samtang sila si Bernie Bregondo ug Mark Jayven Tallo nagkumboya’g 25 puntos sa Cobras nga nagdanga-danga nang daan sa kadaugan human naglabaw, 73-71, apan si Justine Dacalos mipasud sa iyang lay-up sa nahabiling  11 segundos sa regulasyon hinungdan sa overtime. Sa dugang singko minutos, ang Webmasters maoy unang misalida hinungdan nga miabante kini og tres puntos, 79-76, apan mao na diay kadto ang katapusan nilang hunat kay sila si Tallo ug Mark Racho mipasiugda og 10-0 run aron pagselyado sa kadaugan sa Cobras. (BANAT NEWS)