Curry naka-51 pts

CEBU, Philippines - Nagmangtas og maayo si Stephen Curry diin mipataroy siya og 11 ka three-pointers alang sa iyang 51 puntos aron mangulo  sa Golden State Warriors paglubong sa Washington Wizards, 134-121 sa National Basketball Association kagahapon didto sa   Verizon Center sa Washington, D.C.

Ang kadaugan maoy ikawalong sunod-sunod sa Warriors, kinsa mipalambo sa ilang win-loss record ngadto na sa 45-4.

Sayo kaayong gipatilaw sa Warriors ang Wizards sa ilang kabangis  sa  giya ni Curry, kinsa  mihipos  og 36  puntos  pinaagi sa iyang walo ka three pointers. Si Curry nakapundo na og 24 puntos atol sa first quarter.

Si Curry mihimo na og labing menos 50 puntos sa ikaupat nga higayon sa iyang career.  Ang iyang 51 puntos maoy labing daku nga nahimo sa usa ka player didto sa Verizon Center ug mitabla  nilang Michael Jordan ug Gilbert Arenas.

Ang iyang 11 ka  triples maoy labing daghan karon nga season sa NBA.

Milabaw ang Warriors og 17 puntos sa first quarter, apan nakan-an kini sa halftime,  74-60.

Nakasikit unta ang Wizards, 79-81 sa tunga-tungang bahin sa third quarter, apan  miposa og duha ka three pointers si Curry aron mainat ang labaw sa Warriors.

Ang forward nga si Draymond Green mihimo na sab og laing triple-double pinaagi sa iyang 12 puntos, 12 ka assists ug 10 ka rebounds nga usa ka single-season record alang sa Warriors, samtang  si Klay Thompson midugang og 24 puntos. 

Ang  guard sa Wizards nga si John Wall miarte sab didto sa ilang homecourt human siya miposa og season-high 41 puntos uban sa 10 ka assists. 

Ang ilang kapildihan naghatag kanila’g 21-26 nga baraha. 

Gibuksan sa Wizards ang second half pinaagi sa ilang 19-7 run ubos sa pagtimon ni Wall, apan gipalingkod siya sa katapusang 6:18 sa third period human siya matawagi sa iyang ikaupat nga foul.

Niadtong tungora, gipahimuslan sa Warriors ang pagkawala ni Wall  aron molabaw og 11 puntos pagsugod sa fourth period, 103-92. 

Sa lain pang mga duwa, ang Oklahoma City Thunder midaog batok Orlando Magic, 117-114, ang Minnesota Timberwolves mipukan sa Los Angeles Clippers, 108-102, gipilde sa Charlotte Hornets ang Cleveland Cavaliers, 106-97.

Gilubong sa Atlanta Hawks ang Philadelphia Sixers, 124-86, ang Boston Celtics midaog batok sa Detroit Pistons, 102-95. Midaog ang Indiana Pacers batok sa Brooklyn Nets, 114-100.

Ang Miami Heat nakaipsot batok sa Dallas Mavericks, 93-90, gilat-an sa San Antonio Spurs ang New Orleans Pelicans, 110-97 ug ang Chicago Bulls misungag sa Sacramento Kings, 107-102. (BANAT PALARO)