CEI Brokers hari sa BOC Friendship Cup

CEBU, Philippines – Dili pa lang gani kaayo dugay naporma isip usa ka top contender, nakatilaw dayon og usa ka matam-is nga pinaskohan ang CEI Brokers sa magtiayong Wiljun "Sugar" Camay ug Joy Espinoza Camay human sa ilang 76-63 nga kadaogan batok sa laing contending team ang Alin Customs Brokerage nilang Israel Alin ug Rosevir Alin aron langkaton ang titulo sa BOC Friendship Cup kaniadtong Disyembre 22 didto sa barangay Tinago gym, ning dakbayan.

Sa sayo pa, walay hago nga naangkon sa SRBC ni Duke Espina ang ikatulong pwesto pinaagi sa forfeiture tungod kay wala mopatim-aw ang mga sinaligang players sa dethroned champion MP Brokers. Ang SRBC kinsa gipaluyohan  sab ni San Roque Barangay Captain Cyrus Lindog, miabante sa top four human sa ilang upset nga kadaogan batok sa Kentyle Cuisine ug usa sa ilang player nga si kanhi CIT-U point guard Axel Rabaya ang nalakip sa Mythical Five.

Wala mabangbang sa depensa sa Alin si Kerker dela Cerna kinsa maoy nangu sa CEI sa iyang 18 puntos ug maoy napiling MVP. Ang iyang teammate nga si Jojo Solitario napili sab sa Mythical Five kauban nilang Allen Tarona sa Alin Brokers, Ramil Aninon sa Kentyle Cuisine ug Glenn Pendang sa MP Brokers.

Si Solitario midugang og 15 puntos samtang may 13 ug 11 puntos matag usa silang Benick Sealana ug Ronron Bantulay alang sa CEI kinsa gikatakdang mopahigayon og pormal nga victory party didto sa panimalay ni Camay sa barangay Kasambagan ning semanaha.

Naningkamot sab sa tagsa-tagsa nila ka teams silang Camay ug Alin aron ipakita ngadto sa ilang players ang ilang pagka-determinadong modaug. Si Camay igo lang nakahimo'g usa ka attempt lakip ang iyang tulo ka defensive rebounds ug duha ka assists samtang si Alin nakahimo'g usa ka attempt gikan sa three-point area ug usa ka assist sa undergoal ngadto kang Jerome Sanguenza apan na-foul trouble tungod sa iyang sobra ka agresibo sa depensa ug didto pa lang sa uwahing bahin sa second quarter, may upat na ka fouls si Alin hinungdan nga dili kaayo taas ang iyang playing time.

Ang Alin Brokers kinsa naglabaw sa 2-0 ug 17-16, gipangulohan ni kanhi UV Lancers forward Chris Yonnel Perolino kinsa miposa og 17 puntos apan ang wala makatampo og dako mao silang Gerry Singson, Ryan Villomo, Tarona ug BOC president Ryan Barral. Makita sab sa ilang duwa nga medyo dili epektibo ang opensa sa Alin Brokers gani walay puntos si Jonas Cayanong ug wala makahuygo og maayo silang Demo Nuevo Filoteo ug Francis Palero.

Ang CEI kinsa mas preparado nga mosakmit sa titulo, miposte sa labing dako nilang labaw nga 17 puntos sa makadaghang higayon ug kataposan niini sa iskor, 73-56 may usa ka minuto ang nahibilin sa duwa.

Si Camay nagkanayon "at last nakatilaw na gyud mi og  champion" samtang nagbitbit sa ilang championship trophy samtang maoy pangindahay ni Alin nga makabawos sila sa sunod torneyo. Wala pa gani magsugod ang torneyo, ang Alin maoy gituohan nga maoy mahimong kampyion sa BOC Friendship Cup tungod sa pagduwa ni Perolino.

Puntos matag usa:

CEI Brokers (76) – Dela Cerna 18, Solitario 15, Sealana 13, R. Bantulay 11, C. Bantulay 8, T. Laborte 6, N. Laborte 3, Moral 2.

Alin Brokers (63) – Perolino 17, Tarona 8, Filoteo 7, Sanguenza 6, Lleve 6, Estorgio 4, Palero 4, Barral 3, Villomo 2. (BANAT NEWS)