Raptors miparot sa Mavs

CEBU, Philippines – Mipabuhagay og 28 puntos  si  DeMar DeRozan   aron baswaton ang Toronto Raptors  ngadto sa 103-99 nga kadaugan batok sa Dallas Mavericks kagahapon didto sa Air Canada Center sa Toronto, Ontario, Canada.

Si Kyle Lowry midugang og 17 puntos uban sa iyang 10 ka rebounds ug pito ka assists,  samtang si Bismack Biyombo nga adunay nuybe puntos mihimo sa iyang career-high 20 ka rebounds ug si Luis Scola mitampo’g 15 puntos ug siyam ka rebounds alang sa Toronto.

Wala gyud mabiyai ang Raptors sa maong duwa ug naglabaw pa gani sila og 18 puntos sa first quarter. Misikit ang Mavs ngadto na lang sa dos puntos, 99-101 sa katapusang 11.6 segundos  human sa lay-up ni Jeremy Evans. Apan misipyat siya sa iyang free throw ug nakahimo'g duha ka free throws si Terrence Ross alang sa Raptors.

“It was a big win. We finished ugly but we got a big win. We knew they were going to make a run but we were able to withstand it,” si DeRozan miingon.

Ang German star forward nga si Dirk Nowitzki maoy nangu sa Mavs (15-13) pinaagi sa iyang 20 puntos ug pito ka rebounds. Kuwang   na lang siya og 10 puntos  aron malabwan niya si Shaquille O’Neal alang sa ikaunom sa listahan sa NBA’s all-time scoring list.

Sa laing duwa, ang bisitang Detroit Pistons  nagpatuarak og daghang three-pointers aron papason ang ilang 18 puntos nga biya ug ingon man  moiskor og 93-92 nga kadaugan batok sa Miami Heat didto sa American Airlines Arena sa Miami, Florida.

Si Reggie Jackson miiskor og 18 puntos alang sa Pistons ug silang Kentavious Caldwell-Pope ug  Stanley Johnson  miamot og 14 puntos matag usa. Si Steve Blake midugang og 12 puntos, samtang  si Andre Drummond  adunay 11 puntos ug 12 ka rebounds.

Si Chris Bosh maoy nangu sa Heat sa iyang 20 puntos, gisundan ni Dwyane Wade nga adunay 19 puntos ug  Hassan Whiteside sa iyang 16 puntos ug 16 sab ka rebounds.

Midaog sab ang Memphis Grizzlies sa ilang pagpanulong sa Philadelphia Sixers, 104-90 didto sa Wachovia Center, Pennsylvania.

Si Marc Gasol nangu sa Grizzlies nga mihimo’g 19 puntos, unom ka rebounds ug lima ka assists. Si Mike Conley midugang og 18 puntos.

Sa lain pang mga duwa, ang Los Angeles Lakers midaog batok sa Denver Nuggets, 111-107.

Si Kobe Bryant maoy nangu sa Lakers pinaagi sa iyang 31 puntos, samtang si Will Barton mao sab ang nangu sa Nuggets nga adunay 25 puntos. (BANAT NEWS)