UV dunay Ormocanon

CEBU, Philippines – Andam nang mo-asdang ang University of the Visayas (UV) Lancers ngadto sa labing dako nilang hagit karong tuiga, ang Visayas elimination ug Vis-Min Zonal sa prestihiyosong Philippine Collegiate Champions League (PCCL) karong Disyembre 8-9 didto sa Ormoc Superdome.

Sa pagsagubang nila sa maong bug-at nga misyon, ang Lancers moparada sa bag-ong kaplag nilang talento nga si Christian Bolaño, lumad gikan sa Barangay Tambulilid, dakbayn sa Ormoc.

Si Bolaño, nga seguradong makapalig-on og samot sa solido nang daan nga lineup sa UV, nadiskubrehan sayo ning tuig ni Van Halen Parmis, ang scouting coach sa Green Lancers nga lumad sab gikan sa Leyte.

"Sa dihang akong nakita ang iyang talento, wa koy pagduda sa akong huna-huna nga kining bataa taas og maabtan. Potensiyal kaayo siya ug star in the making kun mahatagan lang og saktong paggiya ug training," matud pa ni Parmis, usa sa labing banggiitan nga commercial coach sa nasud nga  gibansagn og 'Panalay King'.

Ang labing bata sa koponan, gihulagway ni Parmis ang 18-anyos nga si Bolaño nga kanhi wala madiskubrihe nga talento nga usa na karon ka bomba sud sa korte nga andam nga mobuto kun ugaling hatagan og oportunidad.

Usa ka four-time MVP, tagsa-tagsa sa Eastern Visayas Regional Athletic Association (EVRAA) ug National Basketball Training Camp (NBTC) ug duha sa Ormoc City Schools and Sports Organization (OCSSO), masukod ang katakos ni Bolaño sa iyang debut uban sa Lancers atubangan sa tagilungsod niyang  Ormocanons sa maong duha ka adlaw nga aksiyon.

Gawas ni Bolaño, ang Lancers mipahiluna sab sa ilang linyada sa beteranong enforcer nga si Jan Monic Soliva, usa sab ka Leyteño gikan sa dakbayan sa Maasin, aron mopahugot sa ilang depensa sa frontcourt.

Ang inspirasyon hinoon sa Lancers dili lamang nagagikan sa duha ka bag-ong puwersa sa ilang sistema. Modugang og kahayag ug kahulogan sa ilang pagbiyahe sa Ormoc mao ang ilang pagtimbaya ngadto sa mga nanginahanglan pinaagi sa pagpanghatag og sayong pinaskuhan didto  sa Linao National High School karong alas 9:30 sa buntag. Ang makapahimus sa sulondon nilang buhat mao  ang mga estudyante sa maong tunghaan diin si Bolaño nagagikan.

"Angayan lamang nga among itunol ang dako namong pasalamat ngadto ni UV Lancers coach Gary Cortes gumikan sa kalumo sa iyang kasingkasing pagpasiugda ning maong kalihukan," dugang pa ni Parmis.

Didto sa Ormoc, ang Lancers naglaraw nga langkaton ang bugtong luna sa Vis-Min ngadto sa PCCL Final Eight nga magkarambola karong Disyembre 13-17 didto sa kaulohan. Sukwahi sa Lancers nga nag-agi usa og eliminasyon, ang University of San Carlos Warriors nakaangkon og awtomatik nga luna sa national finals isip CESAFI champion ingon man ang Far Eastern University Tamaraws sa UAAP ug Letran Knights sa NCAA. (BANAT NEWS)