'Pinoy Pride 34' card hitsas na

CEBU, Philippines – Sila si Milan ‘El Metodico’ Melindo ug ‘King’ Arthur Villanueva makigharong batok sa tadhang Mehikanong kontra, samtang ang ilang kauban sa ALA Stable nga sila si Kevin Jake ‘KJ’ Cataraja, AJ ‘Bazooka’ Banal ug Rocky ‘The Road Warrior’ Fuentes magsagubang sab og malisud nga tahas batok sa langyaw’ng mga kaatbang sa giatngan nga “Pinoy Pride  34: Back with a Vengeance” fight card karong Nobiyembre 28 didto sa Hoops Dome sa Barangay Gun-ob, dakbayan sa Lapu-Lapu.

Si Melindo (32-2, 12KOs) moharong batok ni Carlos ‘Divino’ Fontes (21-3, 17KOs) alang sa WBO International junior flyweight title, samtang si  Villanueva (27-1, 14KOs) mosuway og sakmit sa WBC International super flyweight belt batok ni Victor ‘Spock’ Mendez (19-2-2, 15KOs).

Sila si Cataraja ug Fuentes makigsinukliay og kumo batok sa Indonesian brawlers Faris Nenggo ug Afrizal Tamboresi, samtang si Banal makigpinaksitay batok ni Tanzanian Emilio ‘Prince Kiliminajaro’ Norfat.

Si Cataraja, kanhi amateur standout, seguradong masukod og maayo ang abilidad sa ikaduha pa lamang niyang away isip pro gumikan kay iyang sangkaon si Nenggo, ang beteranong Indon sa 21 ka away diin nagbitbit og  10-8-3 win-loss-draw record.

Nilang lima, sila si Melindo ug Villanueva ang magpas-an sa labing bug-at nga bagahi kay ang duha pulos naglungot-lungot nga makabangon human mangaparot pinaagi sa kontrobersiyal nga desisyon sa miagi nilang world title shots.

Ang 27-anyos nga si Melindo napukan pinaagi sa kuwestiyonable nga sixth round technical decision batok ni Javier Mendoza sa ilang IBF light flyweight title bout niadtong Mayo 30 didto sa Campo Nuevo Ensenada sa Baja California, Mexico.

Si reperi Gerald White miundang sa away sa ikaunom nga hugna gumikan kay dili na makatiwas pa si Mendoza human makaangkon og dakung gisi sa ibabaw nga bahin sa tuo niining mata. Ang mga judges mipadaog ni Mendoza, butang nga gipalagan og maayo sa kampo ni Melindo kay alang kanila ang Pinoy’ng boksidor ang angayan nga ideklara nga mananaog gumikan kay lehitimo man nga kumo ang nakagusbat sa nawong ni Mendoza.

Susama sab ang nasinati ni Villanueva, nga mura’g maoy dumadaog batok ni McJoe Arroyo sa Puerto Rico, apan sa kinauwahian napilde kini pinaagi sa  controversial 10th round technical decision sa ilang IBF super flyweight championship match niadtong Hulyo 18 didto sa Don Haskins Convention Center sa El Paso, Texas. (BANAT NEWS)