Lexmark abante sa Elite Classic semis
CEBU, Philippines – Ang Lexmark Stallions mitagak sa Evo division champion Telstra-Teletech Boomerangs, 90-60, aron pagmartsa niini ngadto sa Elite Classic semifinals sa 11th CSCC E-League men's basketball tournament niadtong Sabado didto sa City Sports Club-Cebu gym.
Sunod sangkaon sa Lexmark mao ang Convergys Converters sa usa ka best-of-three series diin ang mopatigbabaw maoy makigtakos batok sa modaog sa laing semifinal showdown tali sa Accenture Sharks ug Teleperformance All-Stars alang sa kampiyonato.
Si Sylvester Millevo miratsada og 18 puntos, samtang si Franco Angelo Cipriano miposa og 17 puntos uban ang 11 ka rebounds, upat ka blocks, tulo ka steals ug duha ka assists alang sa Stallions, nga wala na molingi pa human miposte og 15 puntos nga labaw sa first half, 42-27.
Si Ralph Loren Martinez mi-amot og 14 puntos, samtang si Jan Oniel Sahilan mikimada og 10 puntos, upat ka rebounds ug duha ka steals sa Stallions, nga milubong og samot sa Boomerangs sa final half, 44-33, aron pagmugna og 30 puntos nga demolisyon.
Nangu sa pilderong Telstra mao si Sam Jordan Hermosa nga mitali og 30 puntos ug unom ka rebounds. (BANAT NEWS)
- Latest
