UC Juniors mipakurat sa Magis Eagles

CEBU, Philippines – Gipakuratan sa University of Cebu Junior Webmasters ang kanhi  wa’y pilde nga Sacred Heart School-Ateneo de Cebu Magis Eagles human moiskor  og  daog, 73-63 aron makauna sa best-of-three finals series sa juniors division sa 15th Cebu Schools Athletic Foundation, Inc. (CESAFI) kagabii didto sa Cebu Coliseum.

Suwayan sa Junior Webmasters ang malisud nga tahas sa pag-angkon sa titulo sa Game-2 ugma. Katapusang higayon nga nakuha sa UC juniors ang korona niadto pang 2008.

Si Froilan Mangubat maoy nangu sa UC  nga mikamada’g 21 puntos uban sa pito ka rebounds, lima ka assists ug lima sab ka steals, apan ang labing dakung rebelasyon sa maong duwa mao ang 14 puntos gikan ni Gelmart Umpad.

Si Umpad, kinsa mihimo sab og lima ka rebounds ug  lima ka steals maoy nagkontrolar sa opensa sa Junior Webmasters. Epektibo sab ang iyang mga assists ngadto kang Mangubat ug sa uban pa niyang kaubanan.

Nalupig pa gani ni Umpad sa scoring ang numero unong high school point guard nga si Jed Colonia, kinsa igo lang nakahimo’g nuybe puntos.

Sa maong duwa, na-outrebounded sa Junior Webmasters ang Magis Eagles tungod sa presensiya ni Jason Florence Abejo nga  didto na pasudla ni coach Joever ‘Brad’ Samonte sa second period.

Si Abejo mihimo sab og double figures pinaagi sa iyang 15 puntos uban sa pito ka rebounds ug usa ka steal, samtang  si Luigi Konrad Gabisan nga wala makatiwas og duwa human makasinati og cramps sa uwahing bahin sa third period, miamot  og   13 puntos.

Ang Magis Eagles, kinsa miduwa nga wala ang ilang top wingman nga si Andrew Velasco tungod sa injury sa iyang tuong kamot atol sa praktis, gipangulohan ni Patrick Yu, kinsa miratsada’g 13 puntos, gisundan nilang   Errol Pastor ug Wayne Berlauna nga miamot og 11 puntos matag usa.

Ang three-pointer ni Mangubat maoy naghatag sa Junior Webmasters og 10 puntos nga labaw sa  nahabiling  3.5 segundos sa third period, apan daling misukli si Colina sa iyang buzzer-beating triple alang sa 40-47 third quarter score.

Didto na sa fourth period hingpit nakontrolar sa Junior Webmasters ang duwa pinaagi sa maayong pagtimon ni Umpad sa backcourt diin ang iyang quarterbacking savvy maoy nakahatag og dakung danyos ngadto sa Magis Eagles.

Milabaw sila pag-usab og 10 puntos, 63-53 sa basket ni Abejo ug wala na nila tugoti nga mabadbad kini sa Magis Eagles, kansang 12 ka nagkadina nga  daog naputol sa labing unang higayon.

Ning pagsuwat, nagsangka pa ang defending champion Southwestern University Cobras batok sa University of San Jose- Recoletos Jaguars sa kaugalingon nilang best-of-three alang sa ikatulong puwesto sa collegiate division. (BANAT NEWS)