Pacquiao moduwa’g basketbol sa Dubai

CEBU, Philippines - Mopakita sa iyang abilidad  si  Pinoy  sports  icon Manny Pacquiao didto sa tunga-tungang sidlakan, apan dili isip usa ka boksidor kun dili usa ka propesyonal nga basketbolista.

Sa usa ka ekslusibong interbiyu, gikompirmar ni Pacquiao sa Banat News nga moduwa siya alang sa Mahindra Enforcers (kanhi KIA Carnival) diin siya maoy playing coach sa usa ka ‘bearing match’ sa PBA Philippine Cup batok sa San Miguel Beermen karong Nobiyembre 6 didto sa Dubai, United Arab Emirates. 

Ang maong makasaysayanong duwa adto himuon sa Al Nasr Sports Club o dili ba sa Hamdan Sports Complex.

“Yes, maglalaro ako sa Dubai this November. Di pa ako segurado kung sino pero sa pagkakaalam ko, San Miguel yata ang makakalaban namin,” matud pa sa eight-division world champion.

Si Pacquiao ania sa Sugbo niadto pang Huwebes aron pagtambong sa usa ka shooting tournament nga gipahinungod alang kaniya, ang 1st Congressman  Manny Pacquiao Challenge.

Sa dihang gipangutana kun makaduwa na ba siya kay padayon pa man siyang nagpaalim sa iyang balatian human maoperahi ang tuo niyang abaga tulo ka bulan ang milabay, ang 36-anyos nga si Pacquiao mitubag nga magdepende ang tanan sa dagan sa iyang rehabilitasyon. Iya hinuon nga giklaro nga gusto na gyud niyang moduwa og balik sa iyang team.

“So far, maganda naman ang recovery ko. Puwede na seguro, pero tingnan lang natin. Basta gusto ko na talagang maglaro uli sa aking team,” dason pa niya.

Apan bisan og dili siya moduwa, ang presensiya ni Pacquiao usa na ka mahinungdanong butang alang sa maong oil-rich emirate diin siya dunay baga 

kaayong panon sa mga fans ilabi sa liboan ka mga Pinoy Filipino OFWs (Overseas Foreign Workers) sa maong dapit.

Gawas sa pakigsinukliay og kumo ibabaw sa ring, ang pagduwa og basketbol usa sa mga hilig ni Pacquiao. Gani kabahin kini sa iyang conditioning kun ugaling mangandam siya sa usa ka dakung away. 

Kahinumduman nga si Pacquiao miduwa lima ka higayon uban sa Kia Sorento sa wala pa siya molarga sa  Amerika aron mag-training alang sa iyang ‘superfight’ batok ni Floyd Mayweather  Jr. niadtong Mayo 3 didto sa MGM Grand sa Las Vegas, Nevada. (BANAT NEWS)