San Miguel gibuno sa KIA

CEBU, Philippines - Usa ka dakung kalampusan ang nahimo sa expansion team  Kia Carnival dihang ilang gibuno ang All-Filipino Cup champion San Miguel Beermen, 88-78 sa nagpadayong aksiyon sa PBA Commissioner’s Cup kagabii didto sa Smart Araneta Coliseum.

Ang 7-foot-3 nga si PJ Ramos mibahog og 22 puntos ug walo ka rebounds aron pangulohan ang Carnival nga miiskor sa  labing una nilang daog sa conference sud sa tulo nila ka duwa.

Miarangkada ang Kia diin milabaw sila, 65-47 sa tunga-tungang bahin sa third period, apan miagi sab og kakulba  dihang  mi-rally ang Beermen sa final period aron mosikit, 67-69  sa katapusang singko minutos.

Hinuon dihang nabutang sa foul trouble si Ramos daling nakaresponde sila si  LA Revilla ug Mark Yee nga pulos nanginit sa fourth period aron inaton pagbalik ang labaw. Sila si Revilla ug Yee mihimo’g  12 ug 11 puntos matag usa.

Bisan pa og naglisud tungod sa higante niyang kaatbang nga si Ramos, si Beermen center Junemar Fajardo mao gihapon ang nakahimo og team-high 18 puntos.

Ang import sa San Miguel nga si Ronald Roberts mihimo usab og 18 puntos, samtang si Arwind Santos miiskor og 14 puntos. (BANAT NEWS)