Barako milubong sa Blackwater

CEBU, Philippines - Wala pa g’yuy kahumanan ang kalbaryo sa Blackwater Elite dihang gilubong sila sa Barako Bull Energy Cola, 92-70  sa PBA Commissioner’s Cup kagahapon didto sa MOA Arena.
Ang Blackwater pabiling wala pay daog sa ilang PBA franchise human sa ilang 0-11 nga rekord sa miaging All-Filipino Cup. Napun-an kini kagahapon  dihang gisugat sila’g pilde sa una nilang duwa sa Commissioner’s Cup. Wala hinuon makauban nila  ang  ilang import nga si Chris Charles. Ang 7-footer nga si Charles wala una gipaduwa sa Blackwater tungod kay nagpaalim pa kini sa iyang injury atol sa ilang praktis.
Si kanhi Toronto Raptors center ug import nga si Solomon Alabi maoy nangulo sa Barako sa iyang 21 puntos, samtang ang bag-ong sakop sa koponan nga si Sol Mercado adunay 20 puntos.
Ang forward nga si Bryan Faundo maoy nangulo sa Elite sa iyang 16 puntos, apan siya ra ang bugtong nakahimo og double-digits, gisundan sa Sugbuanong  Bryan Heruela nga adunay  nuybe puntos.
Labaw ang Barako sa halftime, 62-58,  apan nakatabla ang Blackwater, 60-all sa katapusang 1:28 sa third period.
Ang Barako milusad og 15-0 run sa final period aron ilubong ang Blackwater. (BANAT NEWS)