CEI abante sa quarterfinals

CEBU, Philippines – Naglumpayat sa kalipay ang team owner sa CEI nga si Wiljohn "Sugar" Camay dihang ang iyang CEI quintet naka-ikyas batok sa Transwise pinaagi sa come-from-behind nga kadaogan sa iskor, 109-106 atol sa ilang rubbermatch aron moabante ngadto sa quarterfinals sa 3rd season sa BOC-CIPU Friendship Cup basketball tournament didto sa barangay Tinago gym, ning dakbayan.

May katarungan nga malipay si Camay dili tungod kay ilang ikasangka ang no. 1 seed Customs Portmen ni Boodie Monteno apan tungod kay ilang giapas ang 23 puntos nga biya sa uwahing bahin sa second period, 67-44 nga alang kaniya daw imposible nga ilang mahimo.

Apan gisugat sa CEI ang third period og 14-0 run aron mohinay-hinay og kamang sa unahan hangtod nga misikit sila pag-ayo pagsugod sa fourth quarter.

Kanunay untang naglabaw ang Transwise didto sa fourth period apan nag-anam sab og sikit ang CEI ug kalit lang naglami ang duwa human nila maapas sa hingpit ang Transwise.

Ang three-pointer ni Nico Laborte maoy naghatag sa CEI og 104-103 nga abante ug gikan niadto, nasakmit sa CEI ang momentum. Misikit sa kataposang higayon ang Transwise human mobawos og three-pointer si Loreto Castillo, 106-107 apan may 1.6 segundos na lang ang nahibilin ug napasulod ni Philip Munez ang iyang kataposang duha ka free throws alang sa 109-106 nga kadaogan.

Ang point guard sa CEI nga si Wowie Pino maoy nangu sa ilang opensa samtang midugang og 20 puntos si Munez ug may 14 puntos si Laborte.

Tungod sa kadaogan sa CEI, ang tanang higher-seeded teams pulos gyud miabante sa knockout quarterfinals lakip ang Rollway-Petracorta, MP Brokers, Ynah Brokers batok sa lower-seeded teams nga Transwise, Avenido Brokers, Customs Task Force ug Global Carrier.

Maoy unang magsangka ang no. 1 seed Portmen batok sa CEI kinsa maoy no. 8 seed ug mosunod ang sangka tali sa no. 4 MCWD batok sa no. 5 Rollway-Petracorta.

Ugma magtakos ang laing upat ka teams diin mosuway dayon pag-abante ang no. 2 Alin Brokers ni team owner Isarel Alin batok sa Ynah ug ang Lao Brokers batok sa MP Brokers ni Marty Pimentel.

Puntos matag usa:

CEI (109) —   Pino 31, Munez 20, N. Laborte 14, Amoin 12, T. Laborte 11, Etorma 4, Genobiagon 3, Tangcalagan 3, Camay 2, Inoc 2, Valenzuela 2, Deiparine 1.

Transwise (106) —  Tejeno 20, Tiro 13, Ruiz 11, Alaan 10, Sasing 9, Olmedo 9, Castillo 8, Deniega 8, Tandas 7, Castro 5, Minoza 2. (BANAT NEWS)