Bradley pabor na ni Pacman

CEBU, Philippines – Nausab ang panahom ni Timothy Bradley ug mipabor na siya sa kanhi niya kontra nga si Manny Pacquiao nga maoy mudaog kun mahitabo ang sangka niini batok ni undefeated star Floyd Mayweather Jr.

Si Bradley miingon nga di musalir ang depensa ni Mayweather sa kaidlas ug kusug ni Pacquiao nga mipilde kaniya pinaagi sa unanimous decision niadtong Abril.

Aldo hari gihapon

Pabiling kampiyon sa Ultimate Fighting Championship featherweight division ang Brazilian nga si Jose Aldo human siya midaog pinaagi sa unanimous decision batok ni Chad Mendes kagahapon didto sa Brazil.

Clippers inspirado

Inspirado ang tibuok koponan sa Los Angeles Clippers nga mulampos sa sunod season sa NBA human usab masulbad ang ilang isyu sa ownership.

Ang Clippers may bag-o nang tag-iya nga si Steve Balmer human nila gipalagpot si Donald Sterling kinsa nakontrobersya tungod sa isyu sa ‘racism’.

No. 1 pick Pringle mitimon sa GlobalPort batok Barako

Gipakita ni Stanley Pringle nga angayan gyud siya mahimong No.1 pick human niya pangulohi ang GlobalPort Batang Pier ngadto sa 91-81 nga kadaugan batok sa Barako Bull Energy Cola niadtong miaging gabii didto sa Smart Araneta Coliseum.

Si Alex Cabagnot maoy leading scorer sa GlobalPort sa iyang 21 puntos, apan si Pringle nga miposa og 19 puntos maoy daku og natampo ilabi na sa scoring rally sa third period diin milabaw sila, 70-58.

Kini ang unang daog sa Batang Pier human sila mapilde sa ilang PBA opener batok NLEX Road Warriors niadtong miaging adlaw.

Si coach Pido Jarencio kinsa gidungog nga ilisan ni Franz Pumaren isip coach sa GlobalPort , wala hinuon mitagad sa isyu tungod kay mas mahinungdanon kaniya mahatagan og daog ang koponan. “Regarding sa pressure, sanay na tayo 'dun. Humawak ka lang ng team, nandiyan ang pressure lagi, pero ang iniisip ko lang lagi, huwag lang magkulang sa ginagawa ko,” matud pa niya sa Spin.ph. Kini pa lang ang ikatulong daog ni Jarencio isip coach sa GlobalPort nga nagsugod niadtong miaging season. Si Jarencio adunay 3-16 win-loss record isip head coach sa koponan.

Sa ilang bahin, ang Barako Bull nakatilaw sa ilang ikaduhang sunod-sunod nga daog nga mibutang kanila sa katapusang luna sa standing.

Si Dennis Miranda adunay 16 puntos, samtang ang kanhi player sa GlobalPort nga si RR Garcia mihimo og 12 puntos. (BANAT NEWS)