Shakey’s Girls Volleyball League sugdan karon

CEBU, Philippines- Ibalik dinhi sa Sugbu ang Shakey’s Girls Volleyball League alang sa Central ug Eastern Visayas leg sugod karong adlawa diha sa Aznar Coliseum.

Ang Shakey’s Girls Volleyball League nga premier junior volleyball tournament dinhi sa nasud, adto  unta ipahigayon sa Tacloban City, apan gibalik kini dinhi sa Sugbu tungod kay ang Tacloban dili pa andam nga mo-host sa torneyo tungod sa grabeng kadaut nga gidala sa bagyong Yolanda niadtong Nobiyembre 8 sa miaging tuig.

Bisan og gitawag  kini nga Central and Eastern Visayas leg, ang tanang partisipanteng koponan nga mag-ilog sa luna alang sa national championships pulos taga-Sugbu.

Pangulohan sa defending champion University of San Jose-Recoletos, ang laing koponan nga mopakita’g aksiyon naglakip sa St. Theresa’s College, University of San Carlos, University of Southern  Philippine Foundation, Paref-Southcrest School, Sacred Heart School-Hijas de Jesus, Southwestern University, Don Gerardo Ouano National High School, Sacred Heart School-Ateneo de Cebu ug ang Pajo National High School sa dakbayan sa Lapu-Lapu.

Moduwa sila og single round robin format diin ang top to teams matag bracket moabante ngadto sa crossover semifinals. Ang mudaog magsangka  alang sa kampiyonato. (BANAT NEWS)