CEBU, Philippines - Napilde nang daan si Johnriel Casimero bisan og wala pa siya katungtong sa ring, dihang gihuboan siya sa iyang IBF light flyweight title human siya mapakyas pagkuha sa timbang atol sa weigh-in kagahapon didto sa The Event Centre sa SM City-Cebu.
Si Casimero (19-2, 11KOs) modepensa unta sa iyang bakus batok ni Mauricio Fuentes (16-2, 10KOs), apan mahanaw na sa iyang kamot ang world title modaog o mapilde siya sa away.
Ang 24-anyos nga si Casimero mitimbang og 113.5 lbs. lapas og lima ka libras sa 108 lbs. nga weight-limit nga yano rang nakuha ni Fuentes.
"He (Casimero) was given two hours to get to 108 lbs. but he can't make it, so we are vacating the world title," matud pa ni IBF supervisor Fritz Gaston. "The fight will go on and if Casimero wins, the title will be vacated. This is a great chance for the challenger to claim the title."
Gihatagan og panahon nga makuha ni Casimero ang timbang, apan wala na niya kini gipugos tungod sa iyang kaluya ug pagsakit na sa iyang tiyan.
"Gibuhat na gyud namo tanan pero di na gyud makuha ni Casimero ang timbang," matud pa sa trainer ni Casimero nga si Christopher Tepora.
Sa supporting bouts, si Gadwin Tubigon sa Flores Boxing Stable moaway alang sa bakanteng WBF super featherweight championship batok ni Harmonito Dela Torre sa General Santos City, samtang si Jhack Tepora sa Omega Boxing Gym moharong ni Joash Aparicio sa Bukidnon alang sa bakanteng WBF Asia Pacific super bantamweight belt.