USC miiskor unang daog batok UV

CEBU, Philippines - Milampos ang University of San Carlos (USC) Warriors paglansang sa una nilang daog human ilang gipilde ang University of the Visayas (UV) Green Lancers, 77-71 sa Filoil Flying V Hanes Premier Cup kagahapon didto sa San Juan Arena.

 Si Nico Magat maoy nangulo sa Warriors sa iyang 17 puntos, samtang si Ian Ortega adunay 16 puntos ug si Miguel Plata miamot og 10 puntos.

 "Hats off ako sa players namin," matud pa ni USC coach Junthy Valenzuela sa The Philippine STAR. "Yung game plan namin, andun, yung heart at effort andun. Wala kaming masabi. Lahat binigay nila sa game na 'to."

 Nagbahis ang Warriors sa third period aron moposte og 10 puntos nga bentaha, apan ang Green Lancers mihimo'g scoring rally aron laslasan ang labaw ngadto na lang sa kuwatro puntos, 64-68 sa final period.  Napugngan ang rally sa Lancers dihang miratsada si Cameroonian Espoir Toyambi ug Plata sa katapusang sayes minutos sa duwa aron sumpuon ang dautang laraw sa UV.

 Nakawang lang ang 38 puntos ni pointguard John Abad tungod sa  kapildihan sa iyang koponan.

 Si Raffy Octobre miamot  og 11 puntos, apan nakadugang sa problema sa UV  mao ang pagka-fouled out sa duha nila ka foreign players nga sila si Steve Akomo ug Jean Mpouma sa second half.

PUNTOS MATAG USA

 USC (77) – Magat 17, Ortega 16, Plata 10, Toyambi 9, Shooster 9, Bensig 6, Laude 6, Rabat 4.

 UV (71) – Abad 38, Octobre 11, Mpolina 6, Amoquiz 6, Akomo 4, Perolino 2, Codilla 2, Marquez 2.