Meralco mipatugpa sa Air21

CEBU, Philippines - Usa ka come-from-behind nga kadaugan ang gibuhat sa Meralco Bolts human nila gipukan ang Air21 Express, 109-98, kagahapon sa PBA Commissioner’s Cup didto sa Smart Araneta Coliseum.

Ang import nga si Brian Butch mibagnos sa second half aron pangulohan ang init nga opensiba sa koponan nga mipapas sa dakung labaw sa Air21. Si Butch mirehistro og 40 puntos, samtang si Jared Dillenger miiskor og 20 puntos.

Mi-arte dayun ang bag-ong import sa Air21 nga si Wesley Witherspoon kinsa miposa og 28 puntos aron ihatag ang double-digit nga labaw sa iyang koponan, 53-42, batok sa Meralco.

Samtang nagpadayun ang pagbangis ni Witherspoon, mitampo usab og puntos si veteran center Asi Taulava aron inaton ang labaw sa Air21, 65-50 sa 8:36 sa third period.

Apan pag-abot sa katapusang kuwarter, hinay-hinay nga migukod ang Meralco nga minaug sa labaw ngadto sa uno punto, 97-98, human sa free-throws ni Dillenger. Mga krusyal nga defensive plays ang gipatuman usab sa Meralco aron gub-on ang momentum sa Air21.

Human sa lay-up ni Dillinger nga hingpit nga mihatag sa labaw sa Meralco, 99-98, ang Bolts kapila usab miitsa sa free-throw area nga maoy mihatag kanila sa komportableng labaw, 104-98 sa katapusang minuto sa duwa.

Nakawang ang 44 puntos ni Witherspoon sa kapildehan sa Air21. Laing mitampo sa Express mao sila si Mark Cardona ug Taulava nga nagkumboya og 33 puntos. (BANAT SPORTS)