Sabillo mitaak na sa Mexico

CEBU, Philippines -  Ang walay pildeng ALA Boxing Gym champion nga si Merlito 'Tiger' Sabillo (23-0, 12KOs) mag-atubang og dakung hagit sa pagdepensa sa iyang WBO minimumweight title batok ni Mexican challenger Francisco Rodriguez (13-2, 9KOs) karong Domingo didto sa Arena Monterrey sa Nuevo Leon, Mexico.

 Si Sabillo nga nag-ensayo og dul-an sa duha ka buwan didto sa Estados Unidos atua na karon sa balwarte sa Mehiko uban sa  trainer niining si Edito Villamor.

 "Andam na si Merlito. Makita na gyud ang resulta sa iyang training didto sa US," matud pa ni Villamor.  "Try gyud niya nga makahimo og impressive nga daog. Kompiyansa ko nga mouli gihapon mi sa Pilipinas nga dala ang world title."

 Si Sabillo nagpabiling kampiyon human miresulta sa "draw" ang katapusan niyang away  batok ni Carlos Buitrago sa Nicaragua niadtong Nobiyembre 30 didto sa  Smart Araneta Coliseum.

 Ang lumad nga taga-Tobos, Negros Occidental, miilog sa bakanteng WBO title niadtong Marso sa miaging tuig dihang iyang gipaundang sa eight round ang Colombian nga si Luis Dela Rosa didto sa Colombia.  (BANAT PALARO)