Barako misungag sa Painters
CEBU, Philippines - Nakab-ot sa Barako Bull Energy Cola ang usa ka dakung kadaugan sa ilang opener dihang ilang gibuntog ang finalist sa miaging conference nga Rain or Shine Elasto Painters, 110-106, kagahapon didto sa PBA Philippine Cup didto sa Smart Araneta Coliseum.
Ang import nga si Josh Dollard mipabuto og 44 puntos ug milangkat og 19 ka rebounds aron pangulohan ang Barako Bull.
Nakita nga mas agresibo ang Barako Bull sa pagsugod palang sa duwa dihang milabaw sila og kwatro puntos, 15-11, sa first period sa pagpangulo ni Denok Miranda.
Apan ang Rain or Shine nga padayung nagbangotan human sa sakit nilang kapildehan sa finals sa All-Filipino Cup milusad og rally dihang nanginit ang opensa nila ni Jeff Chan ug Beau Belga aron itukod ang 44-28 nga labaw sa sayung bahin sa second period.
Dali ra hinuong mibawus ang mga shooters sa Barako nga sila si Ronjay Buenafe ug Mike Miller kinsa midala sa opensa sa ilang koponan nga miilog sa labaw gikan sa Painters, 71-70 sa third period.
Gikan didto, nahimong sikit ang duwa ug nagbinayloay og puntos ang duha ka koponan sa final period, apan nakabintaha ang Barako Bull tungod usab sa paningkamot sa ilang import nga si Dollard.
Si Miller miposa og 19 puntos, gisundan nila ni Miranda ug Buenafe nga adunay 13 ug 11 puntos matag usa.
Ang import nga si Alex McLean maoy leading scorer sa Rain or Shine sa iyang 21 puntos, samtang sila si Paul Lee ug Chan nagkumboya og 29 puntos. (BANAT NEWS)
- Latest
