1st Mayor Mike Rama-SRP Midnight Marathon sa Marso 2

CEBU, Philippines -  Nahikay na ang tanan alang sa 1st Mayor Mike Rama-SRP Midnight Marathon sa Marso 2 nga magsugod ug matapos sa South Road Properties (SRP) grounds.

 Tungod kay  sa tungang gabii kini himuon,  si Cebu City Councilor Ritchie Osmeña  mipasalig  nga  makigtambayayong siya sa nagkalain-laing ahensiya aron pagseguro nga luwas ang mga partisipante.

 Ang lumba  gitakda unta niadtong Disyembre 1, apan giuswag  kini aron paghatag og higayon sa relief efforts sa mga lugar nga naapektohan sa bagyong Yolando nga mikuso-kuso sa Visayas region.

 Makabungog nga P200,000 ganting salapi ang giandam alang sa top performers sa lumba nga   naglatid sa 42-kilometers, 21K ug 5K categories.

 Aron paghatag og higayon sa local athletes, ang organizers midugang og buwag  nga kategoriya alang sa langyaw'ng runners ilabi  na sa Kenyans, kinsa maoy dominante sa local running scene sa milabay'ng lima ka tuig.

 Ang registration fee nagkantidad og P350 sa 5K, P700 sa 21K ug P1,200 sa 42K, libre na ang snacks, race bib ug singlet. Mahimong moparehistro sa Runnr sa Ayala Center-Cebu, Cebu City Sports Commission (CCSC)-office  ug sa SM City-Cebu. Mahimo sab nga mobisita sa G-Concept's fan page sa Facebook alang sa dugang mga detalye.

 Ang deadline kutob lang karong Biyernes.

 Gitukod uban sa G-Concept pinaagi sa ilang presidente Jeson L. Guardo, ang Midnight Marathon usa ka fund-raising activity diin ang makabenebisyo niini mao ang Philippine Councilors League-Cebu Chapter ug mga pasiyente sa psychiatric ward sa Vicente Sotto Memorial Medical Center. (BANAT NEWS)