Fuentes Deritso sa world title

CEBU, Philippines - Nakuha ni Rocky 'Road Warrior'  Fuentes sa ALA Boxing Gym ang labing dakung "break" sa iyang career isip pro-boxer dihang gitakda ang iyang sangka alang sa bakanteng  IBF flyweight title batok ni Thai Amnat Ruenroeng karong Enero 22 didto sa Nakhon Ratchasima, Thailand.

 Nagkahayag ang damgo ni Fuentes (35-6-2, 20KOs) nga mahimong world champion, apan kinahanglan una niya nga mapilde ang undefeated nga si Ruenroeng (11-0, 5KOs) sa iyang pagpanulong didto sa Thailand.

 Si Fuentes una nang gitakda nga moaway alang sa IBF title eliminator didto sa Puerto Rico batok ni McWilliams Arroyo, apan nakanselar kini kay wala maplansa sa ALA Promotions ug Puerto Rican boxing promotion ang mga detalye sa away.

 "Rocky (Fuentes) will now be fighting directly for the world title after South African champion Moruti Mthalane vacated his throne.

Now he has to beat this Thai boxer to be a world champion," matud pa ni ALA Promotions president ug CEO Michael Aldeguer.

 Masaligon si Aldeguer nga makuha ni Fuentes ang bakus, hinuon gibati siya'g kabalaka sa judging  kun ugaling moabot sa 12 ka rounds ang away.

 "Rocky is a very experienced fighter and he has long been ready to become a world champion," segun pa ni Aldeguer.

 "I just hope that the Thailand officials will be fair enough in handling this fight."

 Si Fuentes nga wala na mapilde sukad niadtong 2008 ug anaa sa 15-fight winning streak,  kompiyansa nga modaog.

 "Nag-train ko og maayo para ani nga chance. I hope nga mouli ko diri balik sa nasud nga dala na ang bakus," matud pa ni Fuentes, ang kasamtangang OPBF flyweight champion.

 Dili hinuon sayon ang sangka nga sagubangon ni Fuentes tungod kay si Ruenroeng maoy reigning IBF Pan-Pacific flyweight champion.

 Nabantog usab siya  isip "Filipino Executioner"  ug lakip sa iyang mga  biktima mao ang mga Pinoy fighters sama nila ni Louie Bantigue, Danilo Pena, Michael Rodriguez ug Julius Alcos.