La Salle nakauna sa series
CEBU, Philippines - Nakabawos ang UAAP champion De La Salle University (DLSU) Green Archers ngadto sa Southwestern University (SWU) Cobras pinaagi sa pag-iskor og 64-54 nga kadaugan sa Game-1 sa "best-of-three" finals series sa 2013 Philippine Collegiate Champions League (PCCL) kagahapon sa The Arena sa San Juan City, Manila.
Maisip usab kini nga tam-is nga kadaugan alang sa Green Archers human sila gipakuratan sa Cobras sa iskor nga 56-69 pagsugod sa PCCL sa miaging semana.
Laing daog sa La Salle karong hapon, ila nang sakmiton ang titulo nga maoy ilang ikaduhang kampiyonato sa PCCL sukad niadtong 2008.
Bugtong paglaum sa Cobras nga dad-on ang korona dinhi sa Sugbu ang pagbawos batok sa Green Archers karong adlawa.
Walay nahimo ang depensa sa Cobras pagpakgang kang 'King Archer' Jeron Teng, kinsa maoy napiling "best player of the game" sa iyang 18 puntos, unom ka rebounds ug lima ka assists.
Naglisud sab ang Cobras pagpugong nilang Norbert Torres, Tomas Torres ug ubang shooters sa La Salle nga naglakip kang Gab Reyes, kinsa mipataroy og tulo ka three-pointers.
Ang Cobras nga gipangulohan ni Landry Sanjo sa iyang 16 puntos gilubong og labing menos 22 puntos sa duha ka higayon, 54-32 human sa basket ni Reyes ug 59-37 sa basket ni Teng sa wala pa sila misikit ngadto na lang sa nuybe puntos nga biya, 52-61 human sa undergoal basket ni Fabrice Siewe.
Ang Archers ni coach Juno Sauler mosuway pagsakmit sa titulo sa Game-2 karong alas-4 sa hapon.
- Latest
