3 PBA teams andam na sa CFBJ cup

CEBU, Philippines - Andam na ang tulo ka PBA teams alang  sa Cebu Federation of  Beat Journalists (CFBJ) Cup-PBA Invitational Games nga gikatakda sa Nobiyembre 7-9 diha sa Cebu Coliseum.

 Moduwa sa maong torneyo nga magsilbeng pre-season games mao ang Barako Bull Energy Cola, Global Port Batang Pier ug Alaska Aces

 Sa opener sa Nobiyembre 7, ang Barako Bull makigharong sa Global Port sa main game sa alas-7 sa gabii human sa duwa tali sa  Alaska ug commercial team nga CM Farm sa alas-5 sa hapon.

 Ang Barako Bull moparada nilang Danny Seigle, Mick Pennisi, JC Intal, Mark Macapagal ug Fil-American Shawn Weinstein, samtang ang Global Port bituonan nila ni Sol Mercado, Jay Washington, Jondan Salvador ug kanhi MVP Willie Miller.

 Ang labing giatngan nga team ning tulo ka adlaw nga torneyo mao ang Alaska tungod sa presensiya ni Cebuano hotshot Dondon Hontiveros uban ni "Rookie of the Year" awardee Calvin Abueva, Cyrus Baguio, JV Casio ug Sonny Thoss.

 Ang Tagum City-based nga CM Farm gilangkuban sa mga kanhi PBA players ug top collegiate stars ubos sa giya ni University of the Visayas (UV) Green Lancers assistant coach Van Halen Parmis.

 Ang mga tiket nagkantidad og P30 sa general admission, P200 sa upper box, P300 sa lower box, P400 sa stage seats ug P500 sa ringside. (BANAT NEWS)