Montoya hari sa 1st Roger Abella Chessfest

CEBU, Philippines - Nakasinati si Edcel Montoya sa iyang una ug bugtong pilde ngadto ni Felix Shaun Balbona sa final round, apan wala kini makaapekto kaniya kay siya gihapon ang giilang kampiyon sa 1st Roger T. Abella  Memorial   Open Chess Tournament ning bag-o lang didto  sa  E-Mall   Activity    Center.

 Sila si Montoya ug Balbona misangpot sa usa ka three-way tie sa unang dapit sa standings uban ni Ronald Ganzon nga mihipos og 8.0 puntos human gipilde si Bonn Rainuld Tibod sa iyang katapusang duwa. Sa tulo nga nag-una, si Montoya maoy gideklarar nga kampiyon pinaagi sa superior tie-break output gamit ang direct encounter, Bucholz, Sonnenborn Berger ug Median Bucholz systems.

 Sa maong kadaugan, si Montoya mibulsa og P6,000, samtang si Ganzon midawat og P4,000 ug si Balbona miangkon sa P2,000 nga ganti sa ilang pagpahiluna sa ikaduha ug ikatulong dapit. Si NM Merben Roque, kinsa mitapos sa iyang kampanya uban ang daog batok ni Yves Christian Fiel mikutlo og 7.5 puntos ug nagtabla ni Rogelio Enriquez Jr., apan si Roque maoy miangkon sa ikaupat nga dapit pinaagi sa higher tie-break points.

 Mokompleto sa top 12 nga adunay 7.0 puntos matag usa mao sila si  Richard Natividad, Anthony Makinano, Erwin Ababat, Bonn Tibod, Joel Pacuribot, Allan Pason ug  Reynaldo Flores. Sila si Yves Christian Fiel, Mario Mangubat, Carlos Moreno III, Diego Abraham Claro, Rhenzi Kyle Sevillano ug Venancio Loyola Jr. mi-okupar sa ika-13 hangtod sa ika-18 nga dapit sa managsamang 6.5 puntos, samtang sila si Rommel Ganzon ug Bryle Arellano maoy mikompleto sa top 12 finishers.

 Gihimo agi'g paghandom sa mipanaw nga Cebuano sportsman Roger T. Abella, ang torneyo ubos sa bendisyon sa National Chess Federation of the Philippines (NCFP) nahimong posible pinaagi sa suporta sa Rose Pharmacy Inc. pinaagi ni chess patron Boogie Lim ug sa Elizabeth Mall. Ang duha ka adlaw nga kompetisyon gipasiugdahan sa Four Central Squares Chess Association (FCSCA) ubos sa pangama sa NCFP uban sa FIDE arbiters nga silang Felix Poloyapoy Jr. ug Marvin Ruelan nga maoy misuperbisar sa mga duwa. (BANAT NEWS)