Bulldogs misakmit sa kampiyonato sa LABA

 CEBU, Philippines - Gihambat sa walay puangod nga Bulldogs team ang kontra niining Nolbes, 98-84 aron tangagon ang korona sa season-opening conference sa 2013 Los Amigos Basketball Association (LABA) tournament dili pa dugay didto sa Banilad Sports Complex.

 Ang bise presidente sa LABA nga si Gilbert Sebandal ug si  Richard Jordan parehong miiskor og 12 puntos, samtang laing tulo nila ka kauban ang mirehistro sab og double figures alang sa Bulldogs, kinsa maoy nidiktar sa duwa gikan sa pagsugod hangtod nabira ang 14 puntos nga kadaugan.

 Si team owner Arnold Pestaño maoy nangulo sa naparot nga Nolbes nga milansang sab og 12 puntos.

 Si LABA presidente Cris Ubas maoy nitunol sa championship trophy ngadto sa team Bulldogs. Iya usab nga gipaabot ang iyang mainitong pasalamat ngadto sa tanang sakop sa LABA ilabi na ngadto sa duha niya ka bise presidente nga silang Lou Ornopia ug Sebandal, kinsa daku kaayo'g natampo sa kalampusan sa liga.

 Ang mga basketbolista sa LABA mopahigayon sa ilang regular practice sa matag adlaw'ng Lunes ug Miyerkules gikan sa alas-6 hangtod sa alas-10 sa gabii agi'g pagpangandam sa sunod nilang liga nga gikatakda sa bulan sa Hulyo. (BANAT BALITA)

PUNTOS MATAG USA

 Bulldogs (98) - Sebandal 12, Jordan 12, Ocier 12, Monsanto 11, Ramos 10, Bercede 6, Jacalan 6, Anghay 6, Pon 5, Alburo 5, Niez 5, Tijero 4, Migallen 4

 Nolbes (84) -  A. Pestaño 12, Yamomo 10, Rabanal 10, Buhian 8, Cardoza 8, J-Bart 7, Tantuan 6, Oljol 6, D. Pestaño 5, Bayate 4,  Auman 4, Balo 2, Angga 2