Brgy. Bankal mikulit sa ilang ikatulong daog

CEBU, Philippines - Walay kukaluya nga mihakot og daog ang Brgy. Bankal ug ang labing ulahi batok sa Brgy. Canjulao, 73-70 sa seniors division sa nagpadayong Lapu-Lapu City Inter-barangay basketball tournament didto sa Bankal open court sa maong dakbayan.

Upat ka players ang mirehistro og double figures alang sa Brgy. Bankal nga nagpabiling walay pilde sud sa tulo ka duwa.

Gipangulohan kini ni Banban Booc, kinsa mikadlit og 23 puntos, gisundan ni Warren Cañete nga adunay 15 puntos.

Ligas kaayo ang duwa gikan sa pagsugod ug walay usa kanila ang molabaw og sobra singko puntos matag human sa kuwarter. Apan ang Bankal ubos ni Brgy. Capt. Mario Inot maoy mipatigbabaw sa kulbahinam  nga aksiyon.

Silang Lino Martel ug Ryan Villomo miratsada og 11 ug 10 puntos matag usa alang sa Brgy. Bankal ni coach Josak Arong ug  asst. coach Billy Nadado.

Ang Canjulao ni coach Jojo Tampus gipangulohan ni Erlone Baguio nga mipabuhagay og 27 puntos, gisundan ni Jamin pinaagi sa iyang 16 puntos ug John Paul Tampus nga adunay 15 puntos.

Sa maong kapildihan, nabugto ang duha ka sunod-sunod nga daog sa Canjulao nga nagbitbit karon og 2-1 nga baraha ning maong torneyo nga gipaluyohan ni Mayor Paz Radaza ug City Councilor Harry Radaza.

Didto sa Barangay Calawisan Gym, ang host Calawisan team miposte sa ilang ikaduhang daog pinaagi sa pagpilde sa Brgy. Pajo sa iskor nga 81-76 ubos gihapon sa seniors division.

Ang Calawisan nagbitbit na karon og 2-1 nga baraha, samtang ang Pajo adunay 1-3 win-loss record.

PUNTOS MATAG USA

BANKAL (73) - Booc 23, Cañete 15, Martel 11, Villomo 10, M. Inot 6, Pangatungan 2, Tesaluna 2, Canoy

2, Inot 1, Catalan 1

CANJULAO (70) - Baguio 27, Jamin 16, Tampus 15, Berdin 6, Berame 2, Tampus 2,  Tampus 2