CCBI 5-0 na sa HoopStars

CEBU, Philippines - Mao na sa ginhawang paningkamot sa mas paboritong Chamber of Customs Brokers, Inc. (CCBI) five aron ilang hingpit ipadaplin ang ARA Furniture kinsa ilang gipukan sa iskor, 104-100 apan nag-agi una'g kulba tungod kay kanunay silang nabiyaan atol sa nagpadayong HoopStars 2013 Corporate League niadtong Martes sa gabii didto sa J Centre Mall rooftop gym sa dan A.S. Fortuna, Mandaue City.

Kanunay nabiyaan og labing menos 10 puntos ang CCBI sulod sa unang tulo ka quarters ug didto na sa fourth quarter sila nakahuygo dihang migamit sila'g trapping defense aron mapugos og himo'g turnovers ang ilang kontra.

Nagkapuliki og panagang ang ARA Furniture dihang mibawos na og pamuntos ang CCBI kinsa milampos sab sa pagkontrolar sa fasbtreaks sa mas batan-ong ARA Furniture.

Ang CCBI nagduwa nga wala ang ilang pambatong point guard ang kanhi skipper sa UC Webmasters nga si Kenneth Kern Sesante, nagkalisod pag-adjust ang CCBI apan nakakita sila'g paagi diin maoy ilang gisegihan og lawog ang ilang mga big men aron maoy mo-iskor ug gisakripisyo nila ang ubang puntos nga angayan untang himoon sa ilang mga maabtik nga pointguards.

Ang kanhi CIT Wildcats center nga si Ramil Aninon maoy nangu sa opensa sa CCBI sa iyang 27 puntos ug midugang si Daniel Enriquez og 21 puntos aron maghupot og 5-0 nga baraha. Ang bugtong nagpabiling lig-on nga kontra sa Bracket B mao ang laing wa'y pildeng Albert Surplus.

Si Takloy Moral miposa og 11 puntos alang sa CCBI samtang silang Noel Medalle ug Francis Palero parehong miabuno og nuybe puntos matag usa. 

Puntos matag usa:

CCBI (104)---    Aninon 27, Enriquez 21, Moral 11, N. Medalle 9, Palero 9, Laborte 8, B. Medalle 5, Elloren 4, Maningo 4, Bensi 4, Villaronza 2

ARA Furniture (100)--- Maloloy-on 28, Senerpida 25, L. Maloloy-on 17, E. Senerpida 9, Silawan 8, Abad 7, Agusto 3, Senerpida 2