Mandaue boxers mikabkab og bulawan
CEBU, Philippines - Mikabkab og pito ka bulawang medalya ang amateur boxers sa Mandaue City aron dominahon ang Batang Pinoy 2012 Visayas leg didto sa Capitol gym sa Leyte.
Sa taho sa Philboxing.com, nagmangtas ang mga pambatong boksidor gikan sa Mandaue sa tulo ka adlaw nga torneyo nga gisalmotan sa dul-an 50 ka mga boksidor gikan sa Visayas Region.
Mikubkob og bulawan alang sa Team Mandaue mao sila si Raymond Tarona, Jomar Caspe, Vicente Seos-e, Christian John Castanares, Ramil Castañares, Romel Tuñacao ug Jeffrey Estella. Sila si Marco Pomar ug Rhezon Tarona mitiltil og bronze medals.
Naka-gold usab ang mga boksidor sa Cebu City kortesiya ni John Paul Tanudra, si Herjie Gemida mihatag og silver medal ug sila si Joldian Dopalco, John Lloyd Trasporte ug Jeffrey Calvo mihatag og bronze medals matag usa. (BANAT NEWS)
- Latest
