UTASSCO padayong nag-una, 4-0 na

CEBU, Philippines - Mi-arangkada ngadto sa ilang sagunson nga ika-upat nga daog ang UTAsSCO five ni Atty. Flor Yosores human sila maka-ipsot batok sa Ang Tibay Mo sa iskor, 96-90 kaniadtong Martes sa gabii atol sa nagpadayong Power Forty Christmas League basketball tournament didto sa Inayawan Sports Complex.

Sa laing duwa, gilubong sa Allyn & Sons ang wala'y daog nga Alfa Electrical Supply diin misarasay na ngadto sa 0-4 nga baraha ang nauwahi samtang hinayhinay nga mikatkat ngadto sa ikatulong pwesto ang Allyn & Sons kinsa adunay 2-3 nga baraha  ug nakigtabla sa Ang Tibay Mo.

Mibahug og 23 puntos si Wilbur Cabrera ug midugang si Alex Mercado ug 22 puntos alang sa UTASSCO samtang midughit og 18 puntos si Teddy Ebrado. Laing dagku'g mga kubit mao silang Michael Veloso ug Rey Abarquez kinsa mitikdol ug 12 ug 10 puntos matag usa.

Si Fernando Sumargo kinsa maoy leading scorer sa Ang Tibay Mo, mipugnit ug 19 puntos samtang balanseng opensa ang gihimo sa upat niya ka teammates.

Pagka sunod duwa, mihakot og 28 puntos si Inayawan konsehal Julian Capala ug parehong mikabkab ug 24 puntos matag usa silang Carding Verniaz og Nestor Javierto aron pangulohan ang Allyn & Sons sa ilang makabungog nga kadaugan.

Ang pilderong Alfa Electrical Supply gipangulohan sa ilang team owner nga si Chino Kalinga kinsa miposa og 17 puntos ug midugang si Joel Jaca og 16 puntos. Silang Macmac Navares ug Dodoy Abellana miabuno og 13 ug 11 puntos matag usa alang sa Alfa kinsa nangita pa'g paagi kung unsaon paghaw-as sa 0-4 nga lungag.

Sa kasamtangan, ang Jin-jec Marketing maoy naghupot sa ikaduhang pwesto sa ilang 3-2 nga baraha samtang nagtabla sa fourth place ang Park 'N Go BakeShop ug Water Market sa ilang 2-2 nga baraha.

Puntos matag usa:

First Game:

    UTASSCO (96)---    Cabrera 23, Mercado 22, Ebrado 18, Veloso 12, Abarquez 10, Echavez 4, F. Yosores 3, Abasolo 2, Yosores 2

Ang Tibay Mo (90)---   Sumargo 19, Dejacto 12, Gaviola 12, Cabaluna 10, Dejarme 10, Mabalcon 8, Chiong 8, Abasolo 6.

Second Game:

Allyn & Sons (124)---    Capala 28, Vernaiz 24, Javierto 24, Pestano 13, Piezas 11, Cabase 10, Mapait 9.

Alfa Electrical Supply (97)---  Kalinga 17, Jaca 16, Navares 13, Abellana 11, Labalan 8, Flordeliza 8, Sandal 6, Dela Rama 5

Vintage Brand Ug Vintage Train Gisubha'g Daog

 Parehong midaug ang Vintage Brand nga gipangulohan ni Talisay City councilor Rodi Cabigas ug ingon man sab ang Vintage Train atol sa pagbukas sa miaging adlawa sa Vintage Ball Club (VBC) 2012 3rd Conference basketball tournament didto sa barangay Pooc Sports Complex sa Talisay City.

Nasumpo sa Vintage Brand ang Vintage Bomb, 86-76 samtang nakalingkawas ang Vintage Train batok sa Vintage Ship sa iskor, 82-80.

Ang mga Brand cagers ni konsehal Cabigas misandig sa katakos ni pointguard Rickboy Nacario ug sa pag-abag ni Peter Rodriguez kinsa maoy nagtimon sa ilang opensa.

Mi-rally ang Bomb sa second period dihang ilang na-outscore ang ilang kontra, 25-17 pinaagi sa tandem nilang Islao Gerale ug Leo Gerasmeo aron mailog ang labaw atol sa halftime, 40-35.

Didto na sa third period nagsugod og panginit ang Brand diin mi-arte silang Cabigas uban kanilang Cesar Alcordo ug Roy Jumag diin ilang na-outscore ug 14 puntos ang Bomb, 25-11, aron moposte'g 10 puntos nga abante, 61-51.

Silang Nacario ug Alcordo maoy nangu sa opensa sa Brand dihang mipakatap silan'g 20 ug 16 puntos matag usa samtang ang Bomb gipangulohan nilang Gerale ug Gerasmeo kinsa midughit ug 19 og 16 puntos matag usa. Si Edward Abatayo miamot og 15 puntos sa pilderong team.

Sa laing bahin, ang split charities ni Billy Canedo sa kataposang singko segundos maoy nagbaswat sa Train dihang mihipos siya'g 22 puntos ug si Jun Guba midugang og 16 puntos.

Ang Ship gipangulohan nilang Allan Cabrera ug Ric Abatayo sa ilang 23 ug 20 puntos, matag usa.

Puntos matag usa:

First Game: 

VINTAGE BRAND (86)- Nacario 20, Alcordo 16, Rodriguez 12, Jumag 12, Cabigas 11,  Ochia 10, Reyes 5. 

VINTAGE BOMB (76)- Gerale 19, Gerasmeo 16, Abatayo 15, Lastimosa 12,

Dela Calzada 10, Villocero 2, Abalo 2.

Second Game:

VINTAGE TRAIN (82)- Canedo 22 Guba 16, Traya 8, B. Torres 8, T. Torres 8, Rabaya 7, Juablar 7, Unabia 6.

VINTAGE SHIP (80)- Cabrera 23, R. Abatayo 20, Tenedora 16, Estino 10, Bustamante 5, Bas 4, Basallo 2 (GGM)(BANAT NEWS)