Korona tuyo karon sa UV

CEBU, Philippines - Bugtong tuyo sa University of the Visayas (UV) Green Lancers mao ang paglangkat sa korona, apan kinahanglan nga sagubangon nila ang laing lisud nga hagit batok Southwestern University (SWU) Cobras karong adlawa sa Game-4 sa ilang "best-of-five" title series sa 12th Cebu Schools Athletic Foundation Inc. (CESAFI) diha sa Cebu Coliseum.

Ang Lancers ug Cobras magsangka sa alas-5:30 sa hapon.

Bitbit ang 2-1 nga baraha, ang Lancers ni coach Felix 'Donbel' Belano Jr. kinahanglan na lang nga mopakita sa ilang maayong duwa karon aron tapuson ang serye ug masakmit ang ilang ika-10 nga korona sa CESAFI. Samtang ang Cobras ni coach Raul 'Yayoy' Alcoseba miangkon sa Game-1 sa iskor nga 77-72. Nameligro ang Lancers nga mausban, apan swerte kay nakaipsot kini human moposte og   81-79 nga kadaugan sa Game-2 aron tablahon ang series, 1-1.

Sa ilang kulbahinam nga Game-3 niadtong Lunes,   higayon na sab unta nga modaog ang Cobras dihang milabaw sila og tres puntos, 68-65 sa nahabiling 17 segundos sa duwa dihang ang 6-foot-7 sa UV nga si Steve Cedrick Akomo gitawgan og upat ka technical foul tungod sa reklamo sa tawag sa reperi. Apan giusikan sa Cobras ang kahigayonan sa pagdaog dihang sila si Benito Ortuyo ug Justin Aboude misipyat sa ilang upat ka sunod-sunod nga free throws hinungdan sa ilang kapildihan.

Gawas ni Akomo, ang Lancers magsandig sab nilang Hernal 'Wowie' Escocio, Jerome Silva, Phil Mercader, John Abad ug Eman Calo nga maoy modala sa ilang opensa. 

Maghangad sab ang Lancers nilang Rene Saycon, Chris Perolino ug Vincent Mendoza sa tuyo nga matambalan ang ilang kauhaw sa korona sud na sa duha ka tuig.

Human midaog og siyam ka sunod-sunod nga kampiyonato, ang Lancers gihinginlan sa ilang trono sa University of Cebu (UV) Webmasters nga kaniadto gipangulohan pa ni June Mar Fajardo niadtong 2010. Ang Lancers wala na makabalik sa final sa miaging season.

Sa laing bahin, ang Cobras maglaum sa ilang Cameroonian twin towers nga sila Aboude ug Benoit M'bala uban nilang Monbert Arong, Benito Ortuyo, Bernie Bregondo, Bonifacio Guillena ug Joseph Nalos.  (BANAT NEWS)