Nadiskubrihan

Daghan ang midayeg sa Philippine Azkals sa gipakita niining labok bisan wala ang managsuong Phil ug James Younghusband sa four-nation Philippine Football Peace Cup nga gipahigayon didto sa Rizal Memorial Stadium sa Manila.

Kagabii, gikasangka sa mga Pinoy ang Chinese-Taipei ug gipaabot nga modaog ang Azkals, kini kun dili maabta'g demalas. Sa unang duha ka duwa sa Azkals, gilupig nila ang batan-ong Guam booters sa iskor nga 1-0 kortesiya ni Patrick Reichelt.

Bisan usa lang kadto ka iskor sa ika-81 minutos alang sa Azkals mao kini ang nagpaabante sa standing sa mga Pinoy sa maong torneyo nga gitawag usab og Long Teng Cup. Mao kadto ang unang international score alang ni Patrick.

Sunod nga gilampurnas sa Azkals mao ang mas tang-an na nga Macua squad dihang ila kining gisirohan, 5-0 score. 

Pagka nindot og ingon niini kaagresibo ang mga Pinoy bisan ang kaatubang mao ang big names sa Asian football sama sa Indonesia, Vietnam ug Singapore. Magpasalamat kita sa atong football officials bahin niini ilabi na kang German coach Michael Weiss.

Sa akong tan-aw maayo ang gihimo nga wala una paapila ang paboritong strikers nga sila si Phil ug James, ang numero unong scorers sa Azkals tungod kay nakit-an usab sa coaching staff ang ubang potensiyal sa ubang players ilabi na sa opensa.

Apan dili ikalimod nga gikinahanglan pa gyud sa Azkals ang mga Younghusband sa uban pa nilang international outings tungod kay gawas nga eksperiyensyado dili unya lisud alang sa ubang Fil-Foreign players sa Azkals nga mabag-ohan sa bag-ong teamwork.

* * *

Nanganti karon sila si Manny Pacquiao ug Juan Manuel Marquez nga motumba sa usa'g usa sa ilang ikaupat nga panagsangka. 

Angayan lang gyud nga adunay matumba kanila tungod kay kun wala, bisan katapusan na kini nilang sangka sama sa panglantaw sa uban, magbilin kini'g bati nga legasiya. Dili gyud matubag ang mga pangutana kun kinsa gyu'y bagsik nilang duha.

Si Marquez maoy mabulahan niining tanan bisan sa gamay nga sipyat ni Pacquiao kay makapangangkon man siyang sakto gyud ang iyang pagdudang "gihikawan" siya sa mga hurado kaniadto dihang gipilde siya ni Pacquiao sa duha ka higayon.

Samtang si Pacquiao, kinahanglang mapamatud-an niyang mas superior fighter siya itandi kang Marquez pinaagi sa usa ka limpyong knockout win. Dili pa man tantong gitay-an si Pacquiao kun sa panglawas lang ug kondisyon maoy hisgutan basi sa uwahi niyang mga away. Ang nawala lang niya mao ang "killer instincts" ug ang makapaukyab nga kadaugan.

* * *

CONGRATS: Congratulations sa among brother nga si Brod Andro sa Consolacion ug sa iyang kapikas sa ilang pagbugkos sa ilang kaugalingon ngadto sa kaminyoon niadtong Septiyembre 28. Pahalipay gikan sa Alpha Sigma Omega International Collegiate Service Fraternity.

* * *

PAGTULON-AN: Walay lisud kun imong suwayan; mas lisud kun wala kay gibuhat.

[email protected]