Alaska hari sa Mayor's Cup

CEBU, Philippines - Andam na ang Alaska Aces sa ilang kampaniya sa nagsingabot nga 38th season sa PBA, kini dihang sila ang mikampiyon sa 2012 Mayor Mike Rama Cup- PBA pre-season games kagabii diha sa Cebu Coliseum.

Human sa tulo ka adlaw nga kumbati, ang Alaska migawas nga way pilde sud sa tulo ka duwa nga gitapos nila sa usa ka dominanteng kadaugan batok sa host team M.Lhuillier Kwarta Padala Cebu Niños, 76-65.

Ang Alaska ni coach Luigi Trillo una nang mibuntog sa ilang karibal nga San Mig Coffee Mixers niadtong Sabado, 84-77 ug gipilde usab nila ang Talk N' Text Tropang Texters sa opening game niadtong Biyernes.

Naglabaw og otso puntos ang Alaska sa first-half, 23-17 ug giinat pa nila kini ngadto sa 12 puntos human sa third period, 59-47, apan mihimo og rally ang Niños aron inaog ang labaw sa kwatro puntos, 62-58 sa katapusang tres minutos sa duwa.

Hinuon, daling nakarekober ang Alaska dihang nangigo sila si Tony Dela Cruz ug Cyrus Baguio aron hingpit nga ikandado ang ilang daog.

Ang Alaska gibidahan ni Dela Cruz kinsa miiskor og 13 puntos, samtang si RJ Jazul mitira og otso puntos ug si Samigue Eman ug veteran Nic Belasco miamot og siyete puntos matag usa. Ang pilderong M. Lhuillier nga mitapos sa torneyo nga wala makatilaw og daog gipangulohan ni Abby Santos nga adunay 12 puntos.