SG Merchandise kampiyon sa Araw ng Loreto Cup

CEBU, Philippines - Mga kanhi UV Lancers nga silang Rino Berame ug Randy dela Pisa maoy nagtimon sa SG General Merchandise, kinsa misakmit sa korona sa Araw ng Loreto basketball tournament didto sa Loreto, Surigao del Norte ning bag-o didto sa Loreto gym.

Ang SG General Merchandise ni team owner Jason Arquizola, ug coach Marvin Caro mitapos sa torneyo uban ang 4-1 nga baraha. Ang SG gikuha sa ngalan sa duha ka anak ni Arquizola nga silang Stephen ug Grace.

Ang ubang mga sakop sa SG General Merchandise mao silang Eder Saldua nga kanhi FEU Tamaraw, Alano Caputolan, Dominic Gaviola, JL Aberca, Lanke Bacatan, Sam Hermosa, Jake Semblante, Jason Arquizola ug Joey Manguerra.

Nitabang pagkuha og players aron molig-on ang SG Team mao si Lito Manguerra, ang kanhi team official sa KIA Motors sa milabay'ng CESAFI Partner’s Cup 2012 diha sa Cebu Coliseum.

Tulo ka teams gikan sa Sugbu ug tagsa sa host town Loreto ug Manila ang misalmot sa maong torneyo. (BANAT SPORTS)