Makapagana
Good news alang sa lunod-patay nga Azkals fans kay sa labing unang higayon midaog ang ilang team batok sa host Singapore. Ang Azkals miiskor og 2-0 pinaagi ni midfielder Chiffy Caligdong sa first half ug forward Phil Younghusband sa second half.
Sahi kaayo sa uwahing duwa sa Azkals sa usa ka friendly match batok sa Cambodia ning bag-o lang nga parehong wala maka-iskor, 0-all.
Hinuon friendly match ra kini apan duna gihapon kini ratings sa FIFA, busa duna gihapo'y gibug-aton ang matag friendly matches nga atong maapilan.
Ang Singapore Lions matud pa nagkapuliki sa ilang depensa kun unsaon pagpugong ang mga opensiba sa mga Azkals nga kasagaran og langyaw'ng magduduwa.
Halos kompleto ang mga orihinal nga Pinoy-Foreigners nga sila si Neil Etheridge, kinsa 3rd Choice sa European team nga Fulham; Rob Gier, Phil Younghusband; Carli de Murga; Stephen Schrock, James Younghusband; Paul Mulders ug Angel Guirado.
Kining maong mga matang sa balita maoy makapabuhi og maayo sa atong interes sa duwang soccer o football ilabi na nga subsob na ang mga programa sa maong matang sa paugnat sa kusog.
Dili madugay, seguro duna nay full-bloodied Pinoy team nga makaduwa sa susamang mga level sa soccer sa umaabot.
Kini dili makab-ot kun wala pa niining mga Fil-Foreign players nato nga nakapabuhi sa gana sa mga Pinoy sa maong duwa niadtong 2010 dihang midaog ang Azkals sa Suzuki Cup.
* * *
Malaumon pa daw gihapon ang amahan ni Tim Bradley nga may "rematch" sa iyang anak ug ni Manny Pacquiao karong Disyembre 8. Nganong si Pacquiao man gyud iyang gusto nga dili man kaha pareho ka excited ang Pinoy team sa ilaha.
Hinuon, kun atubangon gyud ang duha akong gipaniguro nga walay kausaban sa dinuwaan ni Bradley nga magpunay og dagan. Siguro ang kalainan lang, dili na siya moabot pa og 12 rounds aron makakuha og kuwestiyonable na pud unyang "unanimous decision" sama sa ilang unang sangka.
Mas pabor ang kadaghanan sa ikaupat nga away tali ni Juan Manuel Marquez ug Pacquiao bisan pa man adunay mga misaway nga dili na kini kinahanglan pa.
* * *
Nagpasalamat diay kita sa kadagkuan sa Cebu Eastern College (CEC) sa pagpagamit sa ilang basketball court alang sa 2012 Cebu Press Freedom basketball tournament.
* * *
PAGTULON-AN: Dawata ang kapildihan ug panimbasog sa ikaduhang higayon.
- Latest
- Trending