Semis tuyo sa USJ-R

CEBU, Philippines – Laraw sa second seed University of San Jose-Recoletos (USJ-R) Jaguars nga moangkon og lingkoranan sa semifinal, apan dili sila angayan mokompiyansa batok sa seventh-ranked University of Southern Philippines Foundation (USPF) Panthers sa ilang sangka karong gabii sa 12th Cebu Schools Athletic Foundation, Inc. (CESAFI) basketball tournament diha sa Cebu Coliseum.

Sa pasiunang duwa sa alas-5 sa hapon, ang defending champion University of the Visayas (UV) Baby Lancers nagtinguha usab nga modaog alang sa automatic semis sa dihang ilang sangkaon ang USPF Baby Panthers.

Ang "twice-to-beat" nga Jaguars dili angayang mokompiyansa sa USPF kay igo lang sila nidaog og usa ka palito batok sa Panthers, 75-74 sa una nilang panagbagat.

Masaligon karon ang Jaguars sa ilang kadaugan batok sa Panthers karon nga nakakita na sila og "go-to-guys" sama nilang Abulaiz Suliman, Miguel Tabaloc ug Banjo Capillar ilabi na kun mahimutang sa peligro ang ilang koponan.

Magsalig usab sila sa abilidad ni Jason Olbedado, Renato Abing, James Regalado ug sa higanteng sentro nga si Matthew Parker.

Sa laing bahin, ang Panthers nanginahanglan og mga puntos gikan ni Fritz Dajalos, kinsa wala kaayo makaamot og daku atol sa ilang duha ka duwa sa elimination round. Si Dajalos nabalikan sa tinuoray niyang pamulso atol sa ilang 63-69 nga kapildihan ngadto sa University of Cebu (UC) Webmasters niadtong Sabado sa gabii.

Si Joseph Sedurifa daku sab og tabang, apan ang Panthers nagkinahanglan sab og suporta gikan nilang Art Camello, Lawrence Escanilla ug sa managsuong Earvin ug James Ferraren.

Sa laing bahin, ang Baby Lancers, kinsa napilde ngadto sa Sacred Heart School-Ateneo de Cebu (SHS-AdC) Magis Eagles alang sa No. 1 spot, mosandig ni reigning juniors MVP Andres Paul Desiderio. Mangayo sab siya'g tabang gikan nilang Gerald Fernandez, Ralph Jude Dinolan, Prince Liton Cañete, John Philipp del Cerna, Yusuf Samal ug Leonard Santillan. BANAT SPORTS