PRIME ASIA/UV abante sa partner's cup finals

CEBU, Philippines - Mitusak og crucial baskets silang Chris Perolino ug Phil Mercader sa nahabiling usa ka minuto sa duwa alang sa Prime Asia/UV Lancers nga midaog sa Lion Tiger/USJ-R Jaguars, 96-93 aron moabante sa finals sa 6th CESAFI Partner's Cup niadtong Huwebes sa gabii didto sa Cebu Coliseum.

Ang basket ni Perolino maoy mibuak sa 91-all nga panagtabla ug mihatag sa Prime Asia og 93-91 nga bentaha sa nahibiling 55 segundos sa duwa. Dayon si Mercader miiskor og lay-up gikan sa nindot nga assist ni Eman Calo alang sa 95-91 nga abante sa katapusang 31.3 segundos sa aksiyon.

Si Wowie Escocio kinsa maoy nangu sa Prime Asia sa iyang 25 puntos, misipyat sa iyang usa ka free throw sa nahabiling 11 segundos sa wala pa si Miguel Tabaloc moiskor sa katapusang posisyon sa Lion Tiger.  

Si Escocio miposa og 12 puntos sa fourth quarter, samtang si Perolino, kinsa midugang og 19 puntos alang sa Prime Asia, mitusak og 13 puntos sa third period diin didto sab tungora nagsugod og rally ang Lion Tiger. Nahanaw ang labaw sa Prime Asia, 45-28 sa third period, apan nagsugod sila’g lubad human makatira og three-pointer si Jason Olbedado ug nasundan pa sa talagsaong four-point play ni Banjo Capillar. Miabag sab si James Regalado pinaagi sa iyang pipila ka interceptions aron mosikit, 51-62 sa nahabiling 3:46 sa maong period.

Si Olbedado maoy nangu sa Lion Tiger sa iyang 24 puntos, ang 15 puntos niini gikan sa third period ug si Capillar adunay 10 sa iyang 12 puntos sa fourth quarter.

Ang Lion Tiger kinahanglang modaog batok sa Kia Motors karong adlawa aron makuha ang katapusang lingkoranan sa finals.

PUNTOS MATAG USA

Prime Asia (96) - Escocio 25, Perolino 19, Mercader 16, Abad 10, Calo 9, Avillanoza 7, Mendoza 6

Lion Tiger (93) - Olbedado 24, Abing 18, Capillar 12, Regalado 12, Tabaloc 9, Sanchez 7, Lajato 5, Dela Rama 3, Perez 2, Palileo 1  (BANAT SPORTS)