MANILA, Philippines - Ang pagsali ni Aisam Qureshi para sa Pakistan Davis Cup team ang magpapalalim sa lakas ng bisitang koponan sa gagawing Asia-Ocenia Zone Group II semifinals mula Biyernes hanggang Linggo sa Philippine Columbian Association (PCA) Indoor Courts sa Plaza Dilao, Paco.
Ito na ang ikaanim na pagkakataon na magkikita ang Pilipinas at Pakistan at angat ang host team sa 4-1 iskor.
Noong 2007 at 2009 huling nagkita ang dalawang koponan, nanalo ang Pilipinas na ginawa sa bansa pero wala sa koponan si Qureshi.
Ang beterano ng 2007 at 2009 tie na sina Aqeel Khan at Yasir Khan ay babalik din habang ang pang-apat na miyembro ay si Muhammad Abid. Si Mohammed Khalid ang kanilang non-playing team captain.
Hindi naman na magagamit ng Pilipinas si Cecil Mamiit na siyang nagbida sa mga dating laban vs Pakistani dahil nagretiro na ito sa paglalaro sa Davis Cup.
Si Chris Cuarto ang tatayong non-playing team captain at sasandalan niya sina Fil-Ams Treat Huey at Ruben Gonzales bukod pa kina Johnny Arcilla at ang nagbabalik na si Francis Casey Alcantara.
Si Alcantara ang papalit sa puwestong iiwan ni Jeson Patrombon na may iniindang sprained ankle.
Bukas ay isasagawa ang draw ceremony.