SBC, SSC overall champion sa NC
MANILA, Philippines - Hindi man nakitaan ng lakas sa athletics ay hindi naman maisasantabi ang malakas na kampanya ng San Beda sa 87th NCAA season.
Dinomina ang men’s basketball, swimming at men’s taekwondo bukod sa paglapag sa ikalawang puwesto sa men’s volleyball at women’s taekwondo, ang Lions na tumapos lamang sa pang-anim na puwesto sa track and field ay nagkaroon ng nangungunang 435.5 puntos upang masungkit ang ikalawang sunod na overall title.
Naungusan uli nila ang St. Benilde na kinapos sa asam na ikatlong puwesto sa athletics nang nalagay sa panlima tungo sa kabuuang 427 puntos.
“Naghanda ang lahat ng teams at masaya kami na napanatili namin sa aming bakuran ang overall title,” ani San Beda athletic director Edmundo “Ato” Badolato.
Ito ang ikalawang overall title na napanalunan ng San Beda upang makasalo sa puwesto ang Perpetual Help at ang nagbabakasyong Philippine Christian University.
Ang San Sebastian naman ang nakasalo sa San Beda bilang pinakamahusay na koponan nang dominahin ang juniors division.
Lumabas na kampeon sa athletics, nakalikom ang Staglets ng 258.5 puntos para daigin ang hamon ng La Salle Greenhills at Arellano na tumapos sa ikalawa at ikatlong puwesto sa 253 at 250.5 puntos.
- Latest
- Trending